hai safar mein karwan-e-bahr-o-bar kis ke liye

hai safar meñ kārvān-e-bahr-o-bar kis ke liye

ho rahā hai ehtimām-e-ḳhushk-o-tar kis ke liye

kis kī ḳhātir zā.iqoñ kī saḳhtiyoñ meñ haiñ samar

aur jhuk jaatī hai shāḳh-e-bārvar kis ke liye

kis kī ḳhātir haiñ badalte mausamoñ kī bārisheñ

dil ġhamīñ kis ke liye hai chashm tar kis ke liye

rat-jagoñ meñ gūñjne vaalī sadā.eñ kis kī haiñ

hai hunar kis ke liye arz-e-hunar kis ke liye

kis ne zaḳhm-e-nā-rasī se bhar diye haiñ rāste

chārasāzī kis liye hai chārāgar kis ke liye

lā-makāñ meñ kaun rahtā hai makāñ meñ kyā nahīñ

dasht haiñ kis ke liye dīvār-o-dar kis ke liye

kis ne rakkhī haiñ har ik manzar meñ rañgīñ sā.ateñ

ḳhalq farmā.e ga.e haiñ be-basar kis ke liye

kaun suntā hai havāoñ kī ajab sargoshiyāñ

aur jaatī haiñ havā.eñ dar-ba-dar kis ke liye

hai safar mein karwan-e-bahr-o-bar kis ke liye

ho raha hai ehtimam-e-KHushk-o-tar kis ke liye

kis ki KHatir zaiqon ki saKHtiyon mein hain samar

aur jhuk jati hai shaKH-e-barwar kis ke liye

kis ki KHatir hain badalte mausamon ki barishen

dil ghamin kis ke liye hai chashm tar kis ke liye

rat-jagon mein gunjne wali sadaen kis ki hain

hai hunar kis ke liye arz-e-hunar kis ke liye

kis ne zaKHm-e-na-rasi se bhar diye hain raste

chaarasazi kis liye hai chaaragar kis ke liye

la-makan mein kaun rahta hai makan mein kya nahin

dasht hain kis ke liye diwar-o-dar kis ke liye

kis ne rakkhi hain har ek manzar mein rangin saaten

KHalq farmae gae hain be-basar kis ke liye

kaun sunta hai hawaon ki ajab sargoshiyan

aur jati hain hawaen dar-ba-dar kis ke liye