mujhe na dekh tera intiKHab main hi hun

mujhe na dekh tirā intiḳhāb maiñ hī huuñ

tire vujūd kī raushan kitāb maiñ hī huuñ

jise paḌhā na gayā aur kabhī sunā na gayā

usī kitāb kā bikhrā sā baab maiñ hī huuñ

mujhe na soch shab-e-hijr kī udāsī meñ

guzartī raat kā TuuTā sā ḳhvāb maiñ hī huuñ

jo merī diid meñ Tapkā hai motiyoñ kī tarah

vo terī āñkhoñ kā shaffāf aab maiñ hī huuñ

mire lahū kī harārat se barf pighlī hai

maiñ jāntā huuñ pas-e-inqalāb maiñ hī huuñ

tirī ye zulf-e-mulā.em se aa.egī ḳhushbū

sajā le joḌe meñ taaza gulāb maiñ hī huuñ

mujhe na dekh tera intiKHab main hi hun

tere wujud ki raushan kitab main hi hun

jise paDha na gaya aur kabhi suna na gaya

usi kitab ka bikhra sa bab main hi hun

mujhe na soch shab-e-hijr ki udasi mein

guzarti raat ka TuTa sa KHwab main hi hun

jo meri did mein Tapka hai motiyon ki tarah

wo teri aankhon ka shaffaf aab main hi hun

mere lahu ki hararat se barf pighli hai

main jaanta hun pas-e-inqalab main hi hun

teri ye zulf-e-mulaem se aaegi KHushbu

saja le joDe mein taza gulab main hi hun