lahu ubal ke bahaaron mein rang bharne laga

lahū ubal ke bahāroñ meñ rang bharne lagā

'ufuq kī kokh se sūraj nayā ubharne lagā

ġham-o-nishāt ke mele lage haiñ sīnoñ meñ

ik 'ahd paidā huā hai ik 'ahd marne lagā

kisī kā bach ke nikalnā muhāl hai ab to

usī galī se har ik rāsta guzarne lagā

junūñ-fazā huī phir sang-bārī-e-tiflāñ

badan se shīshe kā har pairahan utarne lagā

'abas hai kal ke liye tum ko pattharoñ kī talāsh

jo dil pe zaḳhm lagā hai kab aaj bharne lagā

kisī ko ā.ina-ḳhānoñ meñ kyā panāh mile

ajal kī raah se har rāsta guzarne lagā

guloñ kī sej ko qadmoñ se rauñd kar 'fāriġh'

zamāna haal ke kāñToñ pe paaoñ dharne lagā

lahu ubal ke bahaaron mein rang bharne laga

'ufuq ki kokh se suraj naya ubharne laga

gham-o-nishat ke mele lage hain sinon mein

ek 'ahd paida hua hai ek 'ahd marne laga

kisi ka bach ke nikalna muhaal hai ab to

usi gali se har ek rasta guzarne laga

junun-faza hui phir sang-bari-e-tiflan

badan se shishe ka har pairahan utarne laga

'abas hai kal ke liye tum ko pattharon ki talash

jo dil pe zaKHm laga hai kab aaj bharne laga

kisi ko aaina-KHanon mein kya panah mile

ajal ki rah se har rasta guzarne laga

gulon ki sej ko qadmon se raund kar 'farigh'

zamana haal ke kanTon pe paon dharne laga