ghazal ko fikr aisi do ki har mahfil taDap uTThe

ġhazal ko fikr aisī do ki har mahfil taḌap uTThe

tire ash'ār sun kar 'mīr' kā bhī dil taḌap uTThe

ye ādāb-e-safar kī diin kī ḳhūbī zarā dekho

agar raahī ruke raste meñ to manzil taḌap uTThe

kabhī kashtī na Dūbegī agar aisī mohabbat ho

idhar kashtī bhañvar meñ ho udhar sāhil taḌap uTThe

hamārī zindagī ko bhī mayassar vo maqām aatā

kabhī maazī se maiñ khelūñ to mustaqbil taḌap uTThe

tirī bhī fikr duniyā se kuchh aisī baat keh jaa.e

koī gyānī taḌap uTThe koī qābil taḌap uTThe

kuchh is andāz se ye jaan bhī jaa.e to behtar hai

hamāre hausloñ ke vaar se qātil taḌap uTThe

'zafar' samjhūñgā mere she'r kī ye kāmyābī hai

tire māthe kī biñdiyā kī agar jhilmil taḌap uTThe

ghazal ko fikr aisi do ki har mahfil taDap uTThe

tere ash'ar sun kar 'mir' ka bhi dil taDap uTThe

ye aadab-e-safar ki din ki KHubi zara dekho

agar rahi ruke raste mein to manzil taDap uTThe

kabhi kashti na Dubegi agar aisi mohabbat ho

idhar kashti bhanwar mein ho udhar sahil taDap uTThe

hamari zindagi ko bhi mayassar wo maqam aata

kabhi mazi se main khelun to mustaqbil taDap uTThe

teri bhi fikr duniya se kuchh aisi baat keh jae

koi gyani taDap uTThe koi qabil taDap uTThe

kuchh is andaz se ye jaan bhi jae to behtar hai

hamare hauslon ke war se qatil taDap uTThe

'zafar' samjhunga mere she'r ki ye kaamyabi hai

tere mathe ki bindiya ki agar jhilmil taDap uTThe