dil keh raha hai unki nazar dekhte hue

dil keh rahā hai un kī nazar dekhte hue

dekheñge kyā idhar vo udhar dekhte hue

ummīd thī kise ki guzar jā.eñge ye din

dil par vufūr-e-ġham kā asar dekhte hue

apnā to haal ye hai ki ik 'umr kaT ga.ī

duniyā-e-dil ko zer-o-zabar dekhte hue

hotā hai aap par bhī asar koī yā nahīñ

ye inqalāb-e-shām-o-sahar dekhte hue

kuchh us taraf se nāma-o-paiġhām hī sahī

muddat huī hai jānib-e-dar dekhte hue

bedād kījiye sitam ījād kījiye

lekin kisī kā qalb-o-jigar dekhte hue

'hairat' se iḳhtilāf kisī kā 'ajab nahīñ

'hairat' kā muntahā-e-nazar dekhte hue

dil keh raha hai un ki nazar dekhte hue

dekhenge kya idhar wo udhar dekhte hue

ummid thi kise ki guzar jaenge ye din

dil par wufur-e-gham ka asar dekhte hue

apna to haal ye hai ki ek 'umr kaT gai

duniya-e-dil ko zer-o-zabar dekhte hue

hota hai aap par bhi asar koi ya nahin

ye inqalab-e-sham-o-sahar dekhte hue

kuchh us taraf se nama-o-paigham hi sahi

muddat hui hai jaanib-e-dar dekhte hue

bedad kijiye sitam ijad kijiye

lekin kisi ka qalb-o-jigar dekhte hue

'hairat' se iKHtilaf kisi ka 'ajab nahin

'hairat' ka muntaha-e-nazar dekhte hue