sitam ki dhup hai yaadon ka mahtab nahin

sitam kī dhuup hai yādoñ kā māhtāb nahīñ

ġham-e-jahāñ kā kahīñ bhī koī hisāb nahīñ

vafā kī raah meñ kāñTe hī ham ko raas aa.e

hamāre baḳht meñ goyā koī gulāb nahīñ

zamīr bech ke hāsil kiyā jo taḳht-o-tāj

sukūn-e-qalb kā is meñ koī nisāb nahīñ

amīr-e-shahr ke mahloñ meñ jashn jaarī hai

ġharīb-e-shahr kī āñkhoñ meñ koī ḳhvāb nahīñ

zamāna pūchhtā hai mujh se dāstān-e-alam

magar ye dukh hai ki ye lā.iq-e-ḳhitāb nahīñ

nichoḌ laa.e haiñ hastī kā ham to ras saarā

ġham-e-hayāt tirā zā.iqa ḳharāb nahīñ

'ajīb rang hai is daur-e-ḳhud-parastī kā

savāl vo haiñ ki jin kā koī javāb nahīñ

kuredte ho jo tum dūsroñ ke 'aib-o-hunar

tumhāre paas meñ ḳhud kā koī hisāb nahīñ

jo bojh sar pe hai vo ham hī jānte haiñ bas

ġham-e-ma’āsh kā is daur meñ hisāb nahīñ

har ek moḌ pe dastak hai ajnabī ġham kī

hayāt vo hai jo hargiz sukūñ kā baab nahīñ

tumhārī bazm meñ ham bhī to aa.e the lekin

hamāre vāste kyuuñ gardish-e-shabāb nahīñ

sitam ki dhup hai yaadon ka mahtab nahin

gham-e-jahan ka kahin bhi koi hisab nahin

wafa ki rah mein kanTe hi hum ko ras aae

hamare baKHt mein goya koi gulab nahin

zamir bech ke hasil kiya jo taKHt-o-taj

sukun-e-qalb ka is mein koi nisab nahin

amir-e-shahr ke mahlon mein jashn jari hai

gharib-e-shahr ki aankhon mein koi KHwab nahin

zamana puchhta hai mujh se dastan-e-alam

magar ye dukh hai ki ye laiq-e-KHitab nahin

nichoD lae hain hasti ka hum to ras sara

gham-e-hayat tera zaiqa KHarab nahin

'ajib rang hai is daur-e-KHud-parasti ka

sawal wo hain ki jin ka koi jawab nahin

kuredte ho jo tum dusron ke 'aib-o-hunar

tumhaare pas mein KHud ka koi hisab nahin

jo bojh sar pe hai wo hum hi jaante hain bas

gham-e-ma’ash ka is daur mein hisab nahin

har ek moD pe dastak hai ajnabi gham ki

hayat wo hai jo hargiz sukun ka bab nahin

tumhaari bazm mein hum bhi to aae the lekin

hamare waste kyun gardish-e-shabab nahin