zarre zarre mein nazar aai haqiqat teri

zarre zarre meñ nazar aa.ī haqīqat terī

'arsh aur farsh kī har chiiz hai aayat terī

dil se taslīm-o-yaqīñ karnā hai tā'at terī

kalma-e-haq meñ hai poshīda shahādat terī

gumbad-e-be-dar-o-dīvār musallā terā

zarra zarra yahāñ kartā hai 'ibādat terī

shīr-e-mādar pe kisī bachche kā haq ho jaise

mere hisse meñ hai is tarh se rahmat terī

rah ke duniyā meñ tirī tujh se baġhāvat jo kareñ

un pe bhī rahtī hai din raat 'ināyat terī

chāñd sūraj tirī tasbīh ke dānoñ kī tarah

gardish-e-charḳh meñ karte haiñ 'ibādat terī

tire har naam kā har harf mirā harf-e-du'ā

inhīñ harfoñ se milī mujh ko hidāyat terī

gardish-e-charḳh hai qabze meñ unhīñ bandoñ ke

zer-e-shamshīr jo karte haiñ 'ibādat terī

kyuuñ na rahmān kā mahbūb ho rahmat vaalā

dost ke haath se hotī hai 'ināyat terī

aisī nūrānī nazar de de 'taqī' ko maulā

jis se vo kartā rahe har-jā ziyārat terī

zarre zarre mein nazar aai haqiqat teri

'arsh aur farsh ki har chiz hai aayat teri

dil se taslim-o-yaqin karna hai ta'at teri

kalma-e-haq mein hai poshida shahadat teri

gumbad-e-be-dar-o-diwar musalla tera

zarra zarra yahan karta hai 'ibaadat teri

shir-e-madar pe kisi bachche ka haq ho jaise

mere hisse mein hai is tarh se rahmat teri

rah ke duniya mein teri tujh se baghawat jo karen

un pe bhi rahti hai din raat 'inayat teri

chand suraj teri tasbih ke danon ki tarah

gardish-e-charKH mein karte hain 'ibaadat teri

tere har nam ka har harf mera harf-e-du'a

inhin harfon se mili mujh ko hidayat teri

gardish-e-charKH hai qabze mein unhin bandon ke

zer-e-shamshir jo karte hain 'ibaadat teri

kyun na rahman ka mahbub ho rahmat wala

dost ke hath se hoti hai 'inayat teri

aisi nurani nazar de de 'taqi' ko maula

jis se wo karta rahe har-ja ziyarat teri