main tera nam taKHayyul mein jun-hi dohraun

maiñ terā naam taḳhayyul meñ jūñ-hī dohrā.ūñ

shabāhatoñ meñ tirī por por khil jā.ūñ

samā'atoñ ko 'atā kar vo sar vo soz-o-gudāz

kisī tarah tirī āvāz ko maiñ sun pā.ūñ

maiñ rāste meñ yahī aas le ke baiThī huuñ

jo muntazir ho koī apne ghar ko lauT aa.uuñ

chale na nashtar-o-ḳhanjar na dil kare ghā.il

zabān-e-yār ko aisī qabā maiñ pahnā.ūñ

ġhazal meñ dard se likkhūñ koī adaq tahrīr

ġham-e-hayāt kī manzar-kashī kiye jā.ūñ

na soz-e-hijr kī talḳhī na qurbatoñ kā ḳhumār

maiñ apne dil ko bhalā kis tarah se bahlā.ūñ

kabhī to ḳhvāb se nikle vujūd ban ke mile

maiñ kab talak koī tasvīr dekhtī jā.ūñ

jo sādgī meñ maza hai siñghār meñ hai kahāñ

agarche nit-na.e andāz-e-husn apnā.ūñ

saje jo shāḳh-e-tamannā meñ yaad kī ḳhushbū

sameTne kabhī baiThūñ to yūñhī muskā.ūñ

maiñ nafratoñ kī huuñ 'aadī so is liye 'zarvā'

sarā-e-‘ishq meñ le kar panāh ghabrā.ūñ

main tera nam taKHayyul mein jun-hi dohraun

shabahaton mein teri por por khil jaun

sama'aton ko 'ata kar wo sar wo soz-o-gudaz

kisi tarah teri aawaz ko main sun paun

main raste mein yahi aas le ke baiThi hun

jo muntazir ho koi apne ghar ko lauT aaun

chale na nashtar-o-KHanjar na dil kare ghail

zaban-e-yar ko aisi qaba main pahnaun

ghazal mein dard se likkhun koi adaq tahrir

gham-e-hayat ki manzar-kashi kiye jaun

na soz-e-hijr ki talKHi na qurbaton ka KHumar

main apne dil ko bhala kis tarah se bahlaun

kabhi to KHwab se nikle wujud ban ke mile

main kab talak koi taswir dekhti jaun

jo sadgi mein maza hai singhaar mein hai kahan

agarche nit-nae andaz-e-husn apnaun

saje jo shaKH-e-tamanna mein yaad ki KHushbu

sameTne kabhi baiThun to yunhi muskaun

main nafraton ki hun 'adi so is liye 'zarwa'

sara-e-‘ishq mein le kar panah ghabraun