کسی کی یاد میں یوں حرف التجا ہوں میں

کسی کی یاد میں یوں حرف التجا ہوں میں

خدا گواہ ہے اب تیرا ہو گیا ہوں میں

عجیب بات ہے کہتے ہو باوفا مجھ کو

جناب آپ کی نظروں میں بے وفا ہوں میں

ستارے راہ میں آتے رہے مجھے ملنے

تلاش چاند میں گھر سے نکل پڑا ہوں میں

مرے قریب رہے تم تو میں بھی سالم تھا

تمہارے بعد تو قسطوں میں بٹ گیا ہوں میں

بہت تلاش کیا پر مجھے ملا ہی نہیں

سکون دل کے لیے کتنا کھو گیا ہوں میں

ہوا خلاف تھی لیکن بجھا نہیں پائی

کسی کی راہ کا جلتا ہوا دیا ہوں میں

تمہارے شہر میں آیا تو ہو گیا مشہور

سو اپنے گاؤں میں گمنام ہی رہا ہوں میں

فرشتے رات عیادت کو آئے تھے وارثؔ

ضعیف ماں کی دعا لے کے سو گیا ہوں میں