kisi ki yaad mein yun harf-e-iltija hun main

kisī kī yaad meñ yuuñ harf-e-iltijā huuñ maiñ

ḳhudā-gavāh hai ab terā ho gayā huuñ maiñ

'ajīb baat hai kahte ho bā-vafā mujh ko

janāb aap kī nazroñ meñ be-vafā huuñ maiñ

sitāre raah meñ aate rahe mujhe milne

talāsh-e-chāñd meñ ghar se nikal paḌā huuñ maiñ

mire qarīb rahe tum to maiñ bhī sālim thā

tumhāre baa'd to qistoñ meñ baT gayā huuñ maiñ

bahut talāsh kiyā par mujhe milā hī nahīñ

sukūn-e-dil ke liye kitnā kho gayā huuñ maiñ

havā ḳhilāf thī lekin bujhā nahīñ paa.ī

kisī kī raah kā jaltā huā diyā huuñ maiñ

tumhāre shahr meñ aayā to ho gayā mash.hūr

so apne gaañv meñ gumnām hī rahā huuñ maiñ

farishte raat 'ayādat ko aa.e the 'vāris'

za'īf maañ kī du'ā le ke so gayā huuñ maiñ

kisi ki yaad mein yun harf-e-iltija hun main

KHuda-gawah hai ab tera ho gaya hun main

'ajib baat hai kahte ho ba-wafa mujh ko

janab aap ki nazron mein be-wafa hun main

sitare rah mein aate rahe mujhe milne

talash-e-chand mein ghar se nikal paDa hun main

mere qarib rahe tum to main bhi salim tha

tumhaare ba'd to qiston mein baT gaya hun main

bahut talash kiya par mujhe mila hi nahin

sukun-e-dil ke liye kitna kho gaya hun main

hawa KHilaf thi lekin bujha nahin pai

kisi ki rah ka jalta hua diya hun main

tumhaare shahr mein aaya to ho gaya mashhur

so apne ganw mein gumnam hi raha hun main

farishte raat 'ayaadat ko aae the 'waris'

za'if man ki du'a le ke so gaya hun main