bandon ke sath hai na wo banda KHuda ke sath

bandoñ ke saath hai na vo banda ḳhudā ke saath

jis kā mu'āmla hai dil-e-mubtalā ke saath

tum bhī piye hue ho na chhoḌo pilā ke saath

āñkheñ milā ke āñkheñ na phero adā ke saath

rāh-e-farār-e-ġham na rah-e-manzil-e-vafā

kis moḌ par vo chhoḌ ga.e mujh ko lā ke saath

maiñ aur tum se dard kā darmāñ talab karūñ

kaisī hayāt maut na luuñ iltijā ke saath

allah re bazm-e-nāz kī sabr-āzmā.iyāñ

ho aa.e ham bhī is dil-e-sabr-āzmā ke saath

vo mehr-o-māh lāla-o-gul le ke kyā kare

sajdoñ kā jis ke rabt ho us naqsh-e-pā ke saath

kis tarh us kā dāman-e-dil haath aa sake

dāman bachā bachā ke chale jo sabā ke saath

jo dost ne kiyā hai vo dushman na kar sake

aisā sulūk ek ḳharāb-e-vafā ke saath

vo aa rahe haiñ jān-e-bahārāñ bane hue

'tābāñ' salām kījiye un ko du'ā ke saath

bandon ke sath hai na wo banda KHuda ke sath

jis ka mu'amla hai dil-e-mubtala ke sath

tum bhi piye hue ho na chhoDo pila ke sath

aankhen mila ke aankhen na phero ada ke sath

rah-e-farar-e-gham na rah-e-manzil-e-wafa

kis moD par wo chhoD gae mujh ko la ke sath

main aur tum se dard ka darman talab karun

kaisi hayat maut na lun iltija ke sath

allah re bazm-e-naz ki sabr-azmaiyan

ho aae hum bhi is dil-e-sabr-azma ke sath

wo mehr-o-mah lala-o-gul le ke kya kare

sajdon ka jis ke rabt ho us naqsh-e-pa ke sath

kis tarh us ka daman-e-dil hath aa sake

daman bacha bacha ke chale jo saba ke sath

jo dost ne kiya hai wo dushman na kar sake

aisa suluk ek KHarab-e-wafa ke sath

wo aa rahe hain jaan-e-bahaaran bane hue

'taban' salam kijiye un ko du'a ke sath