mujhe apna nahin waiz ka gham hai

mujhe apnā nahīñ vā'iz kā ġham hai

ki vo girvīda-e-ḳhvāb-e-iram hai

'aqīdat se sar-e-taslīm ḳham hai

ki ġham un kā bahut hī mohtaram hai

mu'amma hai ki ham par dostoñ kī

'ināyat hai navāzish hai karam hai

adab ke saath us kī qadr kiije

vo ahl-e-zar nahīñ ahl-e-qalam hai

ḳhud apne jehl kā ehsās 'rāhī'

husūl-e-'ilm kā pahlā qadam hai

mujhe apna nahin wa'iz ka gham hai

ki wo girwida-e-KHwab-e-iram hai

'aqidat se sar-e-taslim KHam hai

ki gham un ka bahut hi mohtaram hai

mu'amma hai ki hum par doston ki

'inayat hai nawazish hai karam hai

adab ke sath us ki qadr kije

wo ahl-e-zar nahin ahl-e-qalam hai

KHud apne jehl ka ehsas 'rahi'

husul-e-'ilm ka pahla qadam hai