mohabbat kar ke dekho na mohabbat kis ko kahte hain

mohabbat kar ke dekho nā mohabbat kis ko kahte haiñ

samajh aa.egā phir tum ko aziyyat kis ko kahte haiñ

ye ḳhāmoshī ye bechainī udāsī aur ye tanhā.ī

shikāyat ye nahīñ to phir shikāyat kis ko kahte haiñ

na ham vā'iz na zākir haiñ musavvir haiñ na zāhid haiñ

hameñ mā'lūm kaise ho haqīqat kis ko kahte haiñ

bhale kaT jaa.e sar lekin na chhūTe ek sajda bhī

sikhāyā aap ne ham ko 'ibādat kis ko kahte haiñ

paḌhoge fāteh-e-ḳhaibar kī tum tārīḳh gar jā kar

khulegā raaz tum par phir shujā'at kis ko kahte haiñ

kabhī parda uThā de ruḳh se gar vo māh-rū apne

zamāna jaan jā.egā qayāmat kis ko kahte haiñ

ye kal ke naujavāñ laḌke na hai pās-e-vafā jin ko

hameñ ab ye batā.eñge mohabbat kis ko kahte haiñ

jahāñ apnoñ ke madfan hoñ vatan vo chhoḌ kar jaanā

tumheñ 'mushtāq' kyā mā'lūm hijrat kis ko kahte haiñ

mohabbat kar ke dekho na mohabbat kis ko kahte hain

samajh aaega phir tum ko aziyyat kis ko kahte hain

ye KHamoshi ye bechaini udasi aur ye tanhai

shikayat ye nahin to phir shikayat kis ko kahte hain

na hum wa'iz na zakir hain musawwir hain na zahid hain

hamein ma'lum kaise ho haqiqat kis ko kahte hain

bhale kaT jae sar lekin na chhuTe ek sajda bhi

sikhaya aap ne hum ko 'ibaadat kis ko kahte hain

paDhoge fateh-e-KHaibar ki tum tariKH gar ja kar

khulega raaz tum par phir shuja'at kis ko kahte hain

kabhi parda uTha de ruKH se gar wo mah-ru apne

zamana jaan jaega qayamat kis ko kahte hain

ye kal ke naujawan laDke na hai pas-e-wafa jin ko

hamein ab ye bataenge mohabbat kis ko kahte hain

jahan apnon ke madfan hon watan wo chhoD kar jaana

tumhein 'mushtaq' kya ma'lum hijrat kis ko kahte hain