husn tera jo kabhi wajd mein lata hai mujhe

husn terā jo kabhī vajd meñ laatā hai mujhe

ye jahāñ ā.ina-ḳhāna nazar aatā hai mujhe

dasht-e-pur-ḳhār meñ khīñche liye jaatā hai mujhe

har nayā ishq tire hijr meñ paatā hai mujhe

maiñ nahīñ maslak-e-arbāb-e-vafā se vāqif

husn kyuuñ raaz kī har baat batātā hai mujhe

jaane ye tū hai tirā ġham hai ki dil kī vahshat

jānib-e-koh-e-nidā koī bulātā hai mujhe

muntashir hotī chalī jaatī hai jab zaat mirī

mere andar koī tartīb meñ laatā hai mujhe

ik adū hai jo ujaḌne nahīñ detā mujh ko

ḳhud ko barbād bhī kar luuñ to basātā hai mujhe

garche ḳhud hāsil-e-taḳhlīq hai par husn tirā

bārhā safha-e-hastī se miTātā hai mujhe

manzil-e-ishq ye kaisī hai ki ā.īne meñ

apnā chehra bhī tirī yaad dilātā hai mujhe

husn ban jaatā hai har harf-e-fusūñ-ḳhez mirā

ishq jab sheva-e-guftār sikhātā hai mujhe

ḳhvāhish-e-nashv-o-numā hai mire dil meñ lekin

jitnā uThtā huuñ koī ḳhud se ghaTātā hai mujhe

ye bhī in.ām-e-basīrat hai ki 'shāriq' har dam

saaya ā.īne kī sūrat nazar aatā hai mujhe

husn tera jo kabhi wajd mein lata hai mujhe

ye jahan aaina-KHana nazar aata hai mujhe

dasht-e-pur-KHar mein khinche liye jata hai mujhe

har naya ishq tere hijr mein pata hai mujhe

main nahin maslak-e-arbab-e-wafa se waqif

husn kyun raaz ki har baat batata hai mujhe

jaane ye tu hai tera gham hai ki dil ki wahshat

jaanib-e-koh-e-nida koi bulata hai mujhe

muntashir hoti chali jati hai jab zat meri

mere andar koi tartib mein lata hai mujhe

ek adu hai jo ujaDne nahin deta mujh ko

KHud ko barbaad bhi kar lun to basata hai mujhe

garche KHud hasil-e-taKHliq hai par husn tera

barha safha-e-hasti se miTata hai mujhe

manzil-e-ishq ye kaisi hai ki aaine mein

apna chehra bhi teri yaad dilata hai mujhe

husn ban jata hai har harf-e-fusun-KHez mera

ishq jab shewa-e-guftar sikhata hai mujhe

KHwahish-e-nashw-o-numa hai mere dil mein lekin

jitna uThta hun koi KHud se ghaTata hai mujhe

ye bhi inam-e-basirat hai ki 'shaariq' har dam

saya aaine ki surat nazar aata hai mujhe