tu apne sher ki buniyaad bol-chaal pe rakh

tū apne she'r kī buniyād bol-chāl pe rakh

phir us ke baa'd nigāh-o-nazar ḳhayāl pe rakh

tire bayān se aa.egī bū sadāqat kī

jo ho sake to ye fikr-e-suḳhan kamāl pe rakh

hazār rang haiñ iz.hār ke zamāne meñ

ġhazal ko naaz se andāz-e-ḳhush-ḳhisāl pe rakh

adab kā jauhar-e-nāyāb bhī nazar aa.e

har ek lafz ko mīzān-e-e'tidāl pe rakh

na dekh jurm mirā harf-e-e'tirāf ke baa'd

na bojh aur ḳhudāyā shikasta-hāl pe rakh

hunar yahī hai ki lamhe ko 'umr kar denā

ye haath haath meñ aur gaal mere gaal pe rakh

huuñ tere dar se umīd-e-karam liye baiThā

kabhī nigāh bhī mohtāj ke savāl pe rakh

maiñ shāhkār huuñ terā magar mire maulā

maiñ āftāb nahīñ huuñ mujhe zavāl pe rakh

jo tujh ko manzil-e-maqsūd tak pahuñchnā hai

kabhī yaqīn ko apne na ehtimāl pe rakh

na kar sake ġham-e-daurāñ kabhī bhī afsurda

yaqīñ 'ra.īs' faqat rabb-e-zul-jalāl pe rakh

tu apne she'r ki buniyaad bol-chaal pe rakh

phir us ke ba'd nigah-o-nazar KHayal pe rakh

tere bayan se aaegi bu sadaqat ki

jo ho sake to ye fikr-e-suKHan kamal pe rakh

hazar rang hain izhaar ke zamane mein

ghazal ko naz se andaz-e-KHush-KHisal pe rakh

adab ka jauhar-e-nayab bhi nazar aae

har ek lafz ko mizan-e-e'tidal pe rakh

na dekh jurm mera harf-e-e'tiraf ke ba'd

na bojh aur KHudaya shikasta-haal pe rakh

hunar yahi hai ki lamhe ko 'umr kar dena

ye hath hath mein aur gal mere gal pe rakh

hun tere dar se umid-e-karam liye baiTha

kabhi nigah bhi mohtaj ke sawal pe rakh

main shahkar hun tera magar mere maula

main aaftab nahin hun mujhe zawal pe rakh

jo tujh ko manzil-e-maqsud tak pahunchna hai

kabhi yaqin ko apne na ehtimal pe rakh

na kar sake gham-e-dauran kabhi bhi afsurda

yaqin 'rais' faqat rabb-e-zul-jalal pe rakh