jo shaKHs yahan ishq mein nakaam hua hai

jo shaḳhs yahāñ 'ishq meñ nākām huā hai

phir us kā zamāne meñ baḌā naam huā hai

tum ḳhush ho ki ilzām kisī aur pe Thahrā

ik shaḳhs tire naam se bad-nām huā hai

āġhāz-e-mohabbat kī koī baat na pūchho

anjām jo honā thā vo anjām huā hai

rah-gīr bhī ab us kī gavāhī nahīñ deñge

vo qatl jo raste meñ sar-e-'ām huā hai

ham 'ishq chhupāte the magar chhup nahīñ paayā

jo kaam na honā thā vahī kaam huā hai

kuchh din se tirī yaad bhī aa.ī nahīñ mujh ko

dil phir bhī udaas apnā sar-e-shām huā hai

tujh par kisī mantar kā asar koī na hogā

tujh sā but-e-kāfir bhī kabhī raam huā hai

lab kholnā Thahrā hai yahāñ lā.iq-e-tā'zīr

har lafz yahāñ bā’is-e-ilzām huā hai

ham hoñge shifāyāb tirī nazr-e-karam se

marham se kahāñ zaḳhm ko ārām huā hai

ye zulf-e-girah-gīr koī jaal hai 'faisal'

har tā.ir-e-āzād tah-e-dām huā hai

jo shaKHs yahan 'ishq mein nakaam hua hai

phir us ka zamane mein baDa nam hua hai

tum KHush ho ki ilzam kisi aur pe Thahra

ek shaKHs tere nam se bad-nam hua hai

aaghaz-e-mohabbat ki koi baat na puchho

anjam jo hona tha wo anjam hua hai

rah-gir bhi ab us ki gawahi nahin denge

wo qatl jo raste mein sar-e-'am hua hai

hum 'ishq chhupate the magar chhup nahin paya

jo kaam na hona tha wahi kaam hua hai

kuchh din se teri yaad bhi aai nahin mujh ko

dil phir bhi udas apna sar-e-sham hua hai

tujh par kisi mantar ka asar koi na hoga

tujh sa but-e-kafir bhi kabhi ram hua hai

lab kholna Thahra hai yahan laiq-e-ta'zir

har lafz yahan ba’is-e-ilzam hua hai

hum honge shifayab teri nazr-e-karam se

marham se kahan zaKHm ko aaram hua hai

ye zulf-e-girah-gir koi jal hai 'faisal'

har tair-e-azad tah-e-dam hua hai