jism mein zindagi kasmasane lagi

jism meñ zindagī kasmasāne lagī

dekhte dekhte jaan jaane lagī

vasl kī chhāñv meñ lahlahātī thī jo

hijr kī dhuup us ko jalāne lagī

lab sile hī rahe maslahat meñ jahāñ

aañkh merī vahāñ DabDabāne lagī

mujh se lipTe the yādoñ ke jaale tire

dhīre dhīre jinheñ maiñ haTāne lagī

bebasī se bhī hai ye baḌī bebasī

naam likh likh ke terā miTāne lagī

kaifiyat dil kī sab se chhupā.ī hai yuuñ

bhīgī palkeñ to maiñ muskurāne lagī

nā-ḳhudā ne bhī chhoḌā hai mujh ko vahāñ

merī kashtī jahāñ Dagmagāne lagī

ho gaye sab pareshāñ mirī zaat se

zindagī kyuuñ bure din dikhāne lagī

be-asar ho ga.ī jab vazāhat 'sanā'

ḳhāmushī saath tab se nibhāne lagī

jism mein zindagi kasmasane lagi

dekhte dekhte jaan jaane lagi

wasl ki chhanw mein lahlahati thi jo

hijr ki dhup us ko jalane lagi

lab sile hi rahe maslahat mein jahan

aankh meri wahan DabDabane lagi

mujh se lipTe the yaadon ke jale tere

dhire dhire jinhen main haTane lagi

bebasi se bhi hai ye baDi bebasi

nam likh likh ke tera miTane lagi

kaifiyat dil ki sab se chhupai hai yun

bhigi palken to main muskurane lagi

na-KHuda ne bhi chhoDa hai mujh ko wahan

meri kashti jahan Dagmagane lagi

ho gaye sab pareshan meri zat se

zindagi kyun bure din dikhane lagi

be-asar ho gai jab wazahat 'sana'

KHamushi sath tab se nibhane lagi