hijr ki shab nala-e-dil wo sada dene lage

hijr kī shab nāla-e-dil vo sadā dene lage

sunñe vaale raat kaTne kī duā dene lage

aa.iye hāl-e-dil-e-majrūh suniye dekhiye

kyā kahā zaḳhmoñ ne kyuuñ Tāñke sadā dene lage

kis nazar se aap ne dekhā dil-e-majrūh ko

zaḳhm jo kuchh bhar chale the phir havā dene lage

sunñe vaale ro diye sun kar marīz-e-ġham kā haal

dekhne vaale taras khā kar duā dene lage

juz zamīn-e-kū-e-jānāñ kuchh nahīñ pesh-e-nigāh

jis kā darvāza nazar aayā sadā dene lage

bāġhbāñ ne aag dī jab āshiyāne ko mire

jin pe takiya thā vahī patte havā dene lage

muTThiyoñ meñ ḳhaak le kar dost aa.e vaqt-e-dafn

zindagī bhar kī mohabbat kā silā dene lage

aa.ina ho jaa.e merā ishq un ke husn kā

kyā maza ho dard agar ḳhud hī davā dene lage

sīna-e-sozāñ meñ 'sāqib' ghuT rahā hai vo dhuāñ

uf karūñ to aag duniyā kī havā dene lage

hijr ki shab nala-e-dil wo sada dene lage

sunne wale raat kaTne ki dua dene lage

aaiye haal-e-dil-e-majruh suniye dekhiye

kya kaha zaKHmon ne kyun Tanke sada dene lage

kis nazar se aap ne dekha dil-e-majruh ko

zaKHm jo kuchh bhar chale the phir hawa dene lage

sunne wale ro diye sun kar mariz-e-gham ka haal

dekhne wale taras kha kar dua dene lage

juz zamin-e-ku-e-jaanan kuchh nahin pesh-e-nigah

jis ka darwaza nazar aaya sada dene lage

baghban ne aag di jab aashiyane ko mere

jin pe takiya tha wahi patte hawa dene lage

muTThiyon mein KHak le kar dost aae waqt-e-dafn

zindagi bhar ki mohabbat ka sila dene lage

aaina ho jae mera ishq un ke husn ka

kya maza ho dard agar KHud hi dawa dene lage

sina-e-sozan mein 'saqib' ghuT raha hai wo dhuan

uf karun to aag duniya ki hawa dene lage