haya ke bar se nazren jhuki jhuki jaise

hayā ke baar se nazreñ jhukī jhukī jaise

mile haiñ vo magar is tarh ajnabī jaise

bahut hai dil ke liye us kī kam-nigāhī bhī

mujhe to daulat-e-kaunain mil ga.ī jaise

vo yuuñ ḳhayāl se guzre haiñ jaise mauj-e-sabā

vo yuuñ nigāh meñ aa.e haiñ raushnī jaise

ḳhunak ḳhunak sī ye būñdeñ ye narm narm phuvār

chhalak paḌe tire lahje kī naġhmagī jaise

nahīñ hai dil ke dhaḌakne kī bhī koī āvāz

kisī kī yaad bahut duur le ga.ī jaise

kabhī kabhī mujhe un kā ḳhayāl yuuñ aayā

zarā sī der ko ho jaa.e raushnī jaise

tire baġhair ye 'ālam hai dīda-o-dil kā

kisī fasāne meñ 'unvān kī kamī jaise

vo jab qarīb se guzre to ye huā mahsūs

guzar rahī hai dabe paaoñ zindagī jaise

bahut hai shor ujāloñ kā phir bhī ai 'iqbāl'

bhaTak rahā ho añdheroñ meñ aadmī jaise

haya ke bar se nazren jhuki jhuki jaise

mile hain wo magar is tarh ajnabi jaise

bahut hai dil ke liye us ki kam-nigahi bhi

mujhe to daulat-e-kaunain mil gai jaise

wo yun KHayal se guzre hain jaise mauj-e-saba

wo yun nigah mein aae hain raushni jaise

KHunak KHunak si ye bunden ye narm narm phuwar

chhalak paDe tere lahje ki naghmagi jaise

nahin hai dil ke dhaDakne ki bhi koi aawaz

kisi ki yaad bahut dur le gai jaise

kabhi kabhi mujhe un ka KHayal yun aaya

zara si der ko ho jae raushni jaise

tere baghair ye 'alam hai dida-o-dil ka

kisi fasane mein 'unwan ki kami jaise

wo jab qarib se guzre to ye hua mahsus

guzar rahi hai dabe paon zindagi jaise

bahut hai shor ujalon ka phir bhi ai 'iqbaal'

bhaTak raha ho andheron mein aadmi jaise