mahfil mein baiThiye to latife sunaiye

mahfil meñ baiThiye to latīfe sunā.iye

yuuñ apne apne dard hañsī meñ chhupā.iye

kyūñkar rusūm-e-dahr ko ḳhātir meñ lā.iye

kab tak havā ke ruḳh pe patangeñ uḌā.iye

kamre chamak rahe haiñ añdherī hai har galī

ye qaid to na raushniyoñ par lagā.iye

kyā aarzū kareñge tirī aarzū ke baa'd

sūraj ho sāmne to diye kyā jalā.iye

āñkhoñ meñ āftāb kī kirneñ sameT kar

jab raat aa.e chāroñ taraf phail jā.iye

do chaar āshnā hī nahīñ kam balā-e-jāñ

'rūhī' kisī se rabt yahāñ kyā baḌhā.iye

mahfil mein baiThiye to latife sunaiye

yun apne apne dard hansi mein chhupaiye

kyunkar rusum-e-dahr ko KHatir mein laiye

kab tak hawa ke ruKH pe patangen uDaiye

kamre chamak rahe hain andheri hai har gali

ye qaid to na raushniyon par lagaiye

kya aarzu karenge teri aarzu ke ba'd

suraj ho samne to diye kya jalaiye

aankhon mein aaftab ki kirnen sameT kar

jab raat aae chaaron taraf phail jaiye

do chaar aashna hi nahin kam bala-e-jaan

'ruhi' kisi se rabt yahan kya baDhaiye