jab zarurat thi mujhe hausla-afzai ki

jab zarūrat thī mujhe hausla-afzā.ī kī

sāzisheñ kiiñ mire ahbāb ne paspā.ī kī

aa ga.iiñ raas fazā.eñ mujhe tanhā.ī kī

ab zarūrat hī nahīñ anjuman-ārā.ī kī

aaj āñkhoñ ne sar-e-bazm bharam toḌ diyā

shahr meñ ho ga.ī tash.hīr shanāsā.ī kī

koī Thahrāv kabhī jin kī tabī'at meñ na thā

daad paate haiñ vahī log shakebā.ī kī

dil ke zaḳhmoñ ko ye ehsān gavārā hī nahīñ

aap zahmat na kareñ merī masīhā.ī kī

vahī behtar hai kahe jis ko zamāna behtar

'ādat achchhī nahīñ hai dost ḳhud-ārā.ī kī

us ne ik baar kahā thā mujhe ḳhāmosh raho

phir kahāñ maiñ ne kabhī jur.at-e-goyā.ī kī

tarz badlā na usūloñ se haTe ham 'az.har'

varna har daur meñ logoñ ne jabīñ-sā.ī kī

jab zarurat thi mujhe hausla-afzai ki

sazishen kin mere ahbab ne paspai ki

aa gain ras fazaen mujhe tanhai ki

ab zarurat hi nahin anjuman-arai ki

aaj aankhon ne sar-e-bazm bharam toD diya

shahr mein ho gai tashhir shanasai ki

koi Thahraw kabhi jin ki tabi'at mein na tha

dad pate hain wahi log shakebai ki

dil ke zaKHmon ko ye ehsan gawara hi nahin

aap zahmat na karen meri masihai ki

wahi behtar hai kahe jis ko zamana behtar

'adat achchhi nahin hai dost KHud-arai ki

us ne ek bar kaha tha mujhe KHamosh raho

phir kahan main ne kabhi jurat-e-goyai ki

tarz badla na usulon se haTe hum 'azhar'

warna har daur mein logon ne jabin-sai ki