zikr-e-habib hai kahin fikr-e-maash hai

zikr-e-habīb hai kahīñ fikr-e-ma'āsh hai

sab ko yahāñ kisī na kisī kī talāsh hai

har dil meñ hasratoñ ke haiñ madfan bane hue

har shaḳhs aap apnī umīdoñ kī laash hai

sab jānte haiñ par koī pahchāntā nahīñ

is shahr meñ hamārī bhī kyā būd-o-bāsh hai

kahtā hai jhiil se kisī kankar kī dāstāñ

ab tak jo sat.h-e-āb par ik irti'āsh hai

ehsās ke 'ufuq pe sar-e-shām-e-ġham qatīl

niklā hai koī chāñd magar qaash qaash hai

zikr-e-habib hai kahin fikr-e-ma'ash hai

sab ko yahan kisi na kisi ki talash hai

har dil mein hasraton ke hain madfan bane hue

har shaKHs aap apni umidon ki lash hai

sab jaante hain par koi pahchanta nahin

is shahr mein hamari bhi kya bud-o-bash hai

kahta hai jhil se kisi kankar ki dastan

ab tak jo sath-e-ab par ek irti'ash hai

ehsas ke 'ufuq pe sar-e-sham-e-gham qatil

nikla hai koi chand magar qash qash hai