saji hai mahfil-e-rang-o-tarab udas hain hum

sajī hai mahfil-e-rang-o-tarab udaas haiñ ham

ye rang laa.ī hai us kī talab udaas haiñ ham

faqat ḳhamosh hameñ dekh koī baat na kar

tujhe ḳhabar nahīñ ai be-adab udaas haiñ ham

hamāre lab pa tabassum ko dekh kar ḳhush hai

use ḳhabar hī nahīñ zer-e-lab udaas haiñ ham

tirā firāq sabab thā kabhī udāsī kā

ye haal kyā hai ki ab be-sabab udaas haiñ ham

kisī bhī bazm-e-masarrat meñ jī nahīñ lagtā

'ajīb apnī tabī'at 'ajab udaas haiñ ham

tumheñ hai zo'm bahut dard-e-āshnā.ī kā

hamāre haal ko samjhoge kab udaas haiñ ham

vo ġham-shanās 'atā kar ḳhudā jo ye samjhe

ki kab udaas nahīñ aur kab udaas haiñ ham

matā'-e-zīst bhī nazr-e-ġham-e-ma'āsh huī

bachā na paa.e tumhārī talab udaas haiñ ham

jo raaz dil meñ nihāñ thā vo ho gayā 'az.har'

ki aaj TuuT gayā qufl-e-lab udaas haiñ ham

saji hai mahfil-e-rang-o-tarab udas hain hum

ye rang lai hai us ki talab udas hain hum

faqat KHamosh hamein dekh koi baat na kar

tujhe KHabar nahin ai be-adab udas hain hum

hamare lab pa tabassum ko dekh kar KHush hai

use KHabar hi nahin zer-e-lab udas hain hum

tera firaq sabab tha kabhi udasi ka

ye haal kya hai ki ab be-sabab udas hain hum

kisi bhi bazm-e-masarrat mein ji nahin lagta

'ajib apni tabi'at 'ajab udas hain hum

tumhein hai zo'm bahut dard-e-ashnai ka

hamare haal ko samjhoge kab udas hain hum

wo gham-shanas 'ata kar KHuda jo ye samjhe

ki kab udas nahin aur kab udas hain hum

mata'-e-zist bhi nazr-e-gham-e-ma'ash hui

bacha na pae tumhaari talab udas hain hum

jo raaz dil mein nihan tha wo ho gaya 'azhar'

ki aaj TuT gaya qufl-e-lab udas hain hum