meri tanhai asad usko bata di jae

'merī tanhā.ī 'asad' us ko batā dī jaa.e

varna dīvār se tasvīr haTā dī jaa.e

tā-ki vo samjhe mire ġham kī kahānī kyā hai

us ko ik baar mohabbat kī sazā dī jaa.e

yā phir aisā ho mujhe zaḳhm kī 'ādat na paḌe

yā phir aisā ho mirī 'umr ghaTā dī jaa.e

ab nahīñ hai koī hasrat na tamannā baaqī

raakh jazboñ kī havāoñ meñ uḌā dī jaa.e

āḳhrī baar maiñ manzar kī kahānī likkhūñ

āḳhrī baar charāġhoñ ko havā dī jaa.e

qaid-e-hastī se nikalne kā koī rāsta ho

yā mire paaoñ se zanjīr haTā dī jaa.e

aarzū ho tujhe marne kī 'asad' aur tujh ko

bātoñ bātoñ meñ hī jiine kī du'ā dī jaa.e

'meri tanhai 'asad' us ko bata di jae

warna diwar se taswir haTa di jae

ta-ki wo samjhe mere gham ki kahani kya hai

us ko ek bar mohabbat ki saza di jae

ya phir aisa ho mujhe zaKHm ki 'adat na paDe

ya phir aisa ho meri 'umr ghaTa di jae

ab nahin hai koi hasrat na tamanna baqi

rakh jazbon ki hawaon mein uDa di jae

aaKHri bar main manzar ki kahani likkhun

aaKHri bar charaghon ko hawa di jae

qaid-e-hasti se nikalne ka koi rasta ho

ya mere paon se zanjir haTa di jae

aarzu ho tujhe marne ki 'asad' aur tujh ko

baaton baaton mein hi jine ki du'a di jae