fikr-e-taza se bhi wo tarz purani mange

fikr-e-tāza se bhī vo tarz purānī māñge

muntashir zehn se marbūt kahānī māñge

pyaas itnī hai ki chubhte haiñ zabāñ meñ kāñTe

us kā ye hukm yahāñ koī na paanī māñge

ab koī tark-e-talab ke na bahāne DhūñDe

be-zabāñ ho to nigāhoñ kī zabānī māñge

tausan-e-‘umr kaḌī dhuup kī jānib dauḌe

dil vahī biitī huī shaam suhānī māñge

ho chukī kāvish-e-parvāz-e-taḳhayyul kyā kyā

aadmī chāñd se ab qurb-e-makānī māñge

haa.e ab minnat-e-naqqād uThā.e shā'ir

apne alfāz ke auroñ se ma'ānī māñge

dil sā motī bhī use sauñp diyā hai 'anvar'

aur vo mujh se mohabbat kī nishānī māñge

fikr-e-taza se bhi wo tarz purani mange

muntashir zehn se marbut kahani mange

pyas itni hai ki chubhte hain zaban mein kanTe

us ka ye hukm yahan koi na pani mange

ab koi tark-e-talab ke na bahane DhunDe

be-zaban ho to nigahon ki zabani mange

tausan-e-‘umr kaDi dhup ki jaanib dauDe

dil wahi biti hui sham suhani mange

ho chuki kawish-e-parwaz-e-taKHayyul kya kya

aadmi chand se ab qurb-e-makani mange

hae ab minnat-e-naqqad uThae sha'ir

apne alfaz ke auron se ma'ani mange

dil sa moti bhi use saunp diya hai 'anwar'

aur wo mujh se mohabbat ki nishani mange