دیکھیں نہ گر نوشتۂ دیوار کیا کریں

دیکھیں نہ گر نوشتۂ دیوار کیا کریں

تم ہی کہو کہ دیدۂ خونبار کیا کریں

ڈھونڈا بہت پہ مل نہ سکی دل کی روشنی

اے روشنیٔ کوچہ و بازار کیا کریں

اب تو کسی مقام پہ رکتی نہیں نگاہ

ہاں اے گداز تابش رخسار کیا کریں

آبادیوں میں چین نہ ویرانیاں پسند

اے دل کشیٔ کوچۂ دلدار کیا کریں

ق

دست ہوس میں دامن گل چاک چاک ہے

اب تو بتا کہ تیرے گرفتار کیا کریں

نے خندہ ہائے گل ہیں نہ بلبل کا کاروبار

وا بھی اگر ہوں نرگس بیمار کیا کریں

ان کو تو ہے صبا کا تموج بھی ناگوار

اب طرہ ہائے زلف طرح دار کیا کریں

باری ہماری آئی تو ساغر لنڈھا دیا

ان مغبچوں سے بولئے تکرار کیا کریں

دل میں تو ہے خلیقؔ کڑی دھوپ کا سماں

ہو بھی کہیں تو سایۂ دیوار کیا کریں