dekhen na gar nawishta-e-diwar kya karen

dekheñ na gar navishta-e-dīvār kyā kareñ

tum hī kaho ki dīda-e-ḳhūñbār kyā kareñ

DhūñDā bahut pe mil na sakī dil kī raushnī

ai raushnī-e-kūcha-o-bāzār kyā kareñ

ab to kisī maqām pe ruktī nahīñ nigāh

haañ ai gudāz-e-tābish-e-ruḳhsār kyā kareñ

ābādiyoñ meñ chain na vīrāniyāñ pasand

ai dil-kashī-e-kūcha-e-dil-dār kyā kareñ

qaaf

dast-e-havas meñ dāman-e-gul chāk-chāk hai

ab tū batā ki tere giraftār kyā kareñ

nai ḳhanda-hā-e-gul haiñ na bulbul kā kār-o-bār

vā bhī agar hoñ nargis-e-bīmār kyā kareñ

un ko to hai sabā kā tamavvuj bhī nāgavār

ab turra-hā-e-zulf-e-tarah-dār kyā kareñ

baarī hamārī aa.ī to sāġhar luñDhā diyā

in muġhbachoñ se boliye takrār kyā kareñ

dil meñ to hai 'ḳhalīq' kaḌī dhuup kā samāñ

ho bhī kahīñ to sāya-e-dīvār kyā kareñ

dekhen na gar nawishta-e-diwar kya karen

tum hi kaho ki dida-e-KHunbar kya karen

DhunDa bahut pe mil na saki dil ki raushni

ai raushni-e-kucha-o-bazar kya karen

ab to kisi maqam pe rukti nahin nigah

han ai gudaz-e-tabish-e-ruKHsar kya karen

aabaadiyon mein chain na viraniyan pasand

ai dil-kashi-e-kucha-e-dil-dar kya karen

qaf

dast-e-hawas mein daman-e-gul chaak-chaak hai

ab tu bata ki tere giraftar kya karen

nai KHanda-ha-e-gul hain na bulbul ka kar-o-bar

wa bhi agar hon nargis-e-bimar kya karen

un ko to hai saba ka tamawwuj bhi nagawar

ab turra-ha-e-zulf-e-tarah-dar kya karen

bari hamari aai to saghar lunDha diya

in mughbachon se boliye takrar kya karen

dil mein to hai 'KHaliq' kaDi dhup ka saman

ho bhi kahin to saya-e-diwar kya karen