agar aaj tum na aate ajab iztirar hota

agar aaj tum na aate 'ajab iztirār hotā

kuchh usī ke dil se pūchho jise intizār hotā

agar un ke aage dard-e-jigar ek baar hotā

jo hazār baar kahtā unheñ e'tibār hotā

chaman-e-dayār-e-ġhurbat na bahār par huuñ nāzāñ

abhī phūloñ se milātā jo vatan kā ḳhaar hotā

unheñ aisī kab ġharaz thī mujhe 'āshiqoñ meñ ginte

maiñ kisī hisāb meñ thā jo mirā shumār hotā

mirī qabr par jo aa.e to vo haath mal ke bole

sar-e-gor Daal dete jo gale meñ haar hotā

kabhī bā'd-e-muddat aa.e to ye tā'na de ke bole

yahī in kī shakl rahtī agar intizār hotā

dil-e-muztarib se paarā agar aa ke bahs kartā

na ise sukūn hotā na use qarār hotā

mire halq se ziyāda kahīñ ḳhushk hai vo ḳhanjar

dam-e-zab.h pyaas bujhtī agar ābdār hotā

unheñ ek baar agar ham kisī hiile se bulāte

jo dubāra mar bhī jaate to na e'tibār hotā

sar-e-sham' kis ne kaaTā mire sho'la-rū ke aage

abhī zulm siikh jaatā jo vo hoshyār hotā

jo dil us ne aap māñgā rahī baat shukr kiije

vo ba-jabr chhīn letā to kuchh iḳhtiyār hotā

na ḳhafā ho ruḳh kā bosa jo liyā samajh ke qur.āñ

ki agar adab na kartā to gunāhgār hotā

paḌī ḳhāk-e-ġhair aa kar to na dāmanoñ ko jhaTkā

abhī tyoriyāñ chaḌhāte jo mirā ġhubār hotā

mire dil pe karke qabza hai jigar kā bhī taqāzā

jo vo ek le ke dete to kuchh e'tibār hotā

mirī laash par vo aa.e to ye muskurā ke bole

ki na aañkh band hotī agar intizār hotā

pas-e-marg bhī na hātim kabhī chhoḌtā saḳhāvat

jo shajar lahad se ugtā to vo meva-dār hotā

gire aah khā ke Thokar vo raqīb kī lahad par

'ajab aaj hashr hotā jo mirā mazār hotā

fan-e-'āshiqī meñ rahte na kahīñ ke bhī 'fasāhat'

agar aur misl-e-dil ke koī dost-dār hotā

agar aaj tum na aate 'ajab iztirar hota

kuchh usi ke dil se puchho jise intizar hota

agar un ke aage dard-e-jigar ek bar hota

jo hazar bar kahta unhen e'tibar hota

chaman-e-dayar-e-ghurbat na bahaar par hun nazan

abhi phulon se milata jo watan ka KHar hota

unhen aisi kab gharaz thi mujhe 'ashiqon mein ginte

main kisi hisab mein tha jo mera shumar hota

meri qabr par jo aae to wo hath mal ke bole

sar-e-gor Dal dete jo gale mein haar hota

kabhi ba'd-e-muddat aae to ye ta'na de ke bole

yahi in ki shakl rahti agar intizar hota

dil-e-muztarib se para agar aa ke bahs karta

na ise sukun hota na use qarar hota

mere halq se ziyaada kahin KHushk hai wo KHanjar

dam-e-zabh pyas bujhti agar aabdar hota

unhen ek bar agar hum kisi hile se bulate

jo dubara mar bhi jate to na e'tibar hota

sar-e-sham' kis ne kaTa mere sho'la-ru ke aage

abhi zulm sikh jata jo wo hoshyar hota

jo dil us ne aap manga rahi baat shukr kije

wo ba-jabr chhin leta to kuchh iKHtiyar hota

na KHafa ho ruKH ka bosa jo liya samajh ke quran

ki agar adab na karta to gunahgar hota

paDi KHak-e-ghair aa kar to na damanon ko jhaTka

abhi tyoriyan chaDhate jo mera ghubar hota

mere dil pe karke qabza hai jigar ka bhi taqaza

jo wo ek le ke dete to kuchh e'tibar hota

meri lash par wo aae to ye muskura ke bole

ki na aankh band hoti agar intizar hota

pas-e-marg bhi na hatim kabhi chhoDta saKHawat

jo shajar lahad se ugta to wo mewa-dar hota

gire aah kha ke Thokar wo raqib ki lahad par

'ajab aaj hashr hota jo mera mazar hota

fan-e-'ashiqi mein rahte na kahin ke bhi 'fasahat'

agar aur misl-e-dil ke koi dost-dar hota