har nala tere dard se ab aur hi kuchh hai

har naala tire dard se ab aur hī kuchh hai

har naġhma sar-e-bazm-e-tarab aur hī kuchh hai

arbāb-e-vafā jaan bhī dene ko haiñ tayyār

hastī kā magar husn-e-talab aur hī kuchh hai

ye kaam na le nāla-o-faryād-o-fuġhāñ se

aflāk ulaT dene kā Dhab aur hī kuchh hai

ik silsila-e-rāz hai jiinā ki ho marnā

jab aur hī kuchh thā magar ab aur hī kuchh hai

kuchh mehr-e-qayāmat hai na kuchh nār-e-jahannam

hushyār ki vo qahr-o-ġhazab aur hī kuchh hai

maz.hab kī ḳharābī hai na aḳhlāq kī pastī

duniyā ke masā.ib kā sabab aur hī kuchh hai

behūda-sarī sajde meñ hai jaan khapānā

ā.īn-e-mohabbat meñ adab aur hī kuchh hai

kyā husn ke andāz-e-taġhāful kī shikāyat

paimān-e-vafā ishq kā jab aur hī kuchh hai

duniyā ko jagā de jo adam ko bhī sulā de

sunte haiñ ki vo roz vo shab aur hī kuchh hai

āñkhoñ ne 'firāq' aaj na pūchho jo dikhāyā

jo kuchh nazar aatā hai vo sab aur hī kuchh hai

har nala tere dard se ab aur hi kuchh hai

har naghma sar-e-bazm-e-tarab aur hi kuchh hai

arbab-e-wafa jaan bhi dene ko hain tayyar

hasti ka magar husn-e-talab aur hi kuchh hai

ye kaam na le nala-o-faryaad-o-fughan se

aflak ulaT dene ka Dhab aur hi kuchh hai

ek silsila-e-raaz hai jina ki ho marna

jab aur hi kuchh tha magar ab aur hi kuchh hai

kuchh mehr-e-qayamat hai na kuchh nar-e-jahannam

hushyar ki wo qahr-o-ghazab aur hi kuchh hai

mazhab ki KHarabi hai na aKHlaq ki pasti

duniya ke masaib ka sabab aur hi kuchh hai

behuda-sari sajde mein hai jaan khapana

aain-e-mohabbat mein adab aur hi kuchh hai

kya husn ke andaz-e-taghaful ki shikayat

paiman-e-wafa ishq ka jab aur hi kuchh hai

duniya ko jaga de jo adam ko bhi sula de

sunte hain ki wo roz wo shab aur hi kuchh hai

aankhon ne 'firaq' aaj na puchho jo dikhaya

jo kuchh nazar aata hai wo sab aur hi kuchh hai