hum aandhiyon ke ban mein kisi karwan ke the

ham āñdhiyoñ ke ban meñ kisī kārvāñ ke the

jaane kahāñ se aa.e haiñ jaane kahāñ ke the

ai jān-e-dāstāñ tujhe aayā kabhī ḳhayāl

vo log kyā hue jo tirī dāstāñ ke the

ham tere āstāñ pe ye kahne ko aa.e haiñ

vo ḳhaak ho ga.e jo tire āstāñ ke the

mil kar tapāk se na hameñ kījiye udaas

ḳhātir na kījiye kabhī ham bhī yahāñ ke the

kyā pūchhte ho nām-o-nishān-e-musāfirāñ

hindostāñ meñ aa.e haiñ hindostāñ ke the

ab ḳhaak uḌ rahī hai yahāñ intizār kī

ai dil ye bām-o-dar kisī jān-e-jahāñ ke the

ham kis ko deñ bhalā dar-o-dīvār kā hisāb

ye ham jo haiñ zamīñ ke na the āsmāñ ke the

ham se chhinā hai nāf-piyāla tirā miyāñ

goyā azal se ham saf-e-lab-tishnagāñ ke the

ham ko haqīqatoñ ne kiyā hai ḳharāb-o-ḳhvār

ham ḳhvāb-e-ḳhvāb aur gumān-e-gumāñ ke the

sad-yād-e-yād 'jaun' vo hañgām-e-dil ki jab

ham ek gaam ke na the par haft-ḳhvāñ ke the

vo rishta-hā-e-zāt jo barbād ho ga.e

mere gumāñ ke the ki tumhāre gumāñ ke the

hum aandhiyon ke ban mein kisi karwan ke the

jaane kahan se aae hain jaane kahan ke the

ai jaan-e-dastan tujhe aaya kabhi KHayal

wo log kya hue jo teri dastan ke the

hum tere aastan pe ye kahne ko aae hain

wo KHak ho gae jo tere aastan ke the

mil kar tapak se na hamein kijiye udas

KHatir na kijiye kabhi hum bhi yahan ke the

kya puchhte ho nam-o-nishan-e-musafiran

hindostan mein aae hain hindostan ke the

ab KHak uD rahi hai yahan intizar ki

ai dil ye baam-o-dar kisi jaan-e-jahan ke the

hum kis ko den bhala dar-o-diwar ka hisab

ye hum jo hain zamin ke na the aasman ke the

hum se chhina hai naf-piyala tera miyan

goya azal se hum saf-e-lab-tishnagan ke the

hum ko haqiqaton ne kiya hai KHarab-o-KHwar

hum KHwab-e-KHwab aur guman-e-guman ke the

sad-yaad-e-yaad 'jaun' wo hangam-e-dil ki jab

hum ek gam ke na the par haft-KHwan ke the

wo rishta-ha-e-zat jo barbaad ho gae

mere guman ke the ki tumhaare guman ke the