sabhi qasmen sabhi wade irade TuT jate hain

sabhī qasmeñ sabhī vā'de irāde TuuT jaate haiñ

havas buniyād ho jin kī vo rishte TuuT jaate haiñ

hunar sab meñ kahāñ hotā hai sach ko jhuuT karne kā

zabāneñ ḳhushk paḌ jaatī haiñ lahje TuuT jaate haiñ

badan se laakh behtar hai badan ke 'aks kā rishta

chaTakte haiñ jab ā.īne to chehre TuuT jaate haiñ

hifāzat raat bhar kartī haiñ āñkheñ chand ḳhvāboñ kī

magar vo bhī sahar tak aate aate TuuT jaate haiñ

shab-e-hijrāñ meñ aañsū toltī palkoñ ko samjhā do

musalsal bārisheñ hone se raste TuuT jaate haiñ

muqaddar har qadam par Thokareñ detā hai jab 'sāhil'

tumhārī haisiyat kyā achchhe achchhe TuuT jaate haiñ

sabhi qasmen sabhi wa'de irade TuT jate hain

hawas buniyaad ho jin ki wo rishte TuT jate hain

hunar sab mein kahan hota hai sach ko jhuT karne ka

zabanen KHushk paD jati hain lahje TuT jate hain

badan se lakh behtar hai badan ke 'aks ka rishta

chaTakte hain jab aaine to chehre TuT jate hain

hifazat raat bhar karti hain aankhen chand KHwabon ki

magar wo bhi sahar tak aate aate TuT jate hain

shab-e-hijran mein aansu tolti palkon ko samjha do

musalsal barishen hone se raste TuT jate hain

muqaddar har qadam par Thokaren deta hai jab 'sahil'

tumhaari haisiyat kya achchhe achchhe TuT jate hain