mere KHwabon ka jo ghar tha wo khanDar lagta hai

mere ḳhvāboñ kā jo ghar thā vo khañDar lagtā hai

lag ga.ī dekhne vaale kī nazar lagtā hai

munfarid haiñ ye mahakte hue alfāz ke phuul

us kī bātoñ meñ buzurgoñ kā asar lagtā hai

gosha-e-zehn meñ afkār kā vārid honā

mom se jism meñ ik raqs-e-sharar lagtā hai

bad-gumānī kā ye 'ālam hai ki har chand unheñ

saaf dāman bhī mirā ḳhuun se tar lagtā hai

apnī bātoñ kī safā.ī meñ kahī bātoñ se

phir na.ī baat na nikle mujhe Dar lagtā hai

mere qisse inhī bikhre hue malboñ se suno

mere bachpan kā ye chhūTā huā ghar lagtā hai

rah badal letā huuñ maiñ haal koī pūchh na le

jaanā pahchānā huā koī agar lagtā hai

kitnā bach bach ke chalūñ rāh-e-zamāñ meñ 'rāzī'

yuuñ to har gaam pe imkān-e-ḳhatar lagtā hai

mere KHwabon ka jo ghar tha wo khanDar lagta hai

lag gai dekhne wale ki nazar lagta hai

munfarid hain ye mahakte hue alfaz ke phul

us ki baaton mein buzurgon ka asar lagta hai

gosha-e-zehn mein afkar ka warid hona

mom se jism mein ek raqs-e-sharar lagta hai

bad-gumani ka ye 'alam hai ki har chand unhen

saf daman bhi mera KHun se tar lagta hai

apni baaton ki safai mein kahi baaton se

phir nai baat na nikle mujhe Dar lagta hai

mere qisse inhi bikhre hue malbon se suno

mere bachpan ka ye chhuTa hua ghar lagta hai

rah badal leta hun main haal koi puchh na le

jaana pahchana hua koi agar lagta hai

kitna bach bach ke chalun rah-e-zaman mein 'raazi'

yun to har gam pe imkan-e-KHatar lagta hai