yaron mein to mashhur hai yarana hamara

yāroñ meñ to mash.hūr hai yārāna hamārā

is shahr kā dushman bhī hai dīvāna hamārā

zāhir meñ to ḳhush-bāsh nazar aate haiñ lekin

dil ġham se tumhāre nahīñ begāna hamārā

āñkhoñ se baḌhātā hai koī pyaas hamārī

hoñToñ se koī bhartā hai paimāna hamārā

kab aaoge aur aa ke gale ham se miloge

dil pūchhtā hai ham se ye rozāna hamārā

bin tere jo zinda haiñ to zinda hī kahāñ haiñ

yuuñ jiine se behtar nahīñ mar jaanā hamārā

'izzat kā sharaf ham ko virāsat meñ milā hai

nasloñ se hai andāz-e-sharīfāna hamārā

jaañ de ke chale aa.e dar-e-yār pe 'faisal'

maqbūl ho shāyad yahī nazrāna hamārā

yaron mein to mashhur hai yarana hamara

is shahr ka dushman bhi hai diwana hamara

zahir mein to KHush-bash nazar aate hain lekin

dil gham se tumhaare nahin begana hamara

aankhon se baDhata hai koi pyas hamari

honTon se koi bharta hai paimana hamara

kab aaoge aur aa ke gale hum se miloge

dil puchhta hai hum se ye rozana hamara

bin tere jo zinda hain to zinda hi kahan hain

yun jine se behtar nahin mar jaana hamara

'izzat ka sharaf hum ko wirasat mein mila hai

naslon se hai andaz-e-sharifana hamara

jaan de ke chale aae dar-e-yar pe 'faisal'

maqbul ho shayad yahi nazrana hamara