unT ka qad ghaTa ke dekh zara

uuñT kā qad ghaTā ke dekh zarā

ḳhud ko parvat banā ke dekh zarā

ek bachcha milegā hañstā huā

koī ġhuncha khilā ke dekh zarā

aa batā.ūñ tujhe ḳhushī kyā hai

ġham kisī kā uThā ke dekh zarā

raushnī Daal degī ik parda

sach añdheroñ meñ aa ke dekh zarā

be-libāsī zamīñ kī miT jaa.e

ghaas hī kuchh ugā ke dekh zarā

kaise bantī hai ik sadī lamha

soī yādeñ jagā ke dekh zarā

niiñd TūTegī kab ye dastak se

ek Thokar lagā ke dekh zarā

bujh ke rah jā.eñge 'alī' sūraj

apne dil ko jalā ke dekh zarā

unT ka qad ghaTa ke dekh zara

KHud ko parwat bana ke dekh zara

ek bachcha milega hansta hua

koi ghuncha khila ke dekh zara

aa bataun tujhe KHushi kya hai

gham kisi ka uTha ke dekh zara

raushni Dal degi ek parda

sach andheron mein aa ke dekh zara

be-libasi zamin ki miT jae

ghas hi kuchh uga ke dekh zara

kaise banti hai ek sadi lamha

soi yaaden jaga ke dekh zara

nind TuTegi kab ye dastak se

ek Thokar laga ke dekh zara

bujh ke rah jaenge 'ali' suraj

apne dil ko jala ke dekh zara