har samt charaghan sa tha zulmat se pahle

har samt charāġhāñ sā thā zulmāt se pahle

dekhī thī sahar ham ne bhī is raat se pahle

me’yār-e-suḳhan zer-o-bam-e-nai to nahīñ hai

har naġhma faqat chīḳh hai jazbāt se pahle

jiddat kā chaman hai usī fankār kā hissa

guzrā hai jo sahrā-e-rivāyāt se pahle

har raah ye kahtī hai yaqīnan koī sūraj

guzrā hai daraḳhshānī-e-zarrāt se pahle

yuuñ chain to qismat meñ kabhī bhī na thā lekin

ye haal na thā pursish-e-hālāt se pahle

ham ne bhī ġham-e-zindagī siine se lagāyā

lekin ye huā terī mulāqāt se pahle

ye rang ye bū jo haiñ tirī zulf kā talchhaT

mauhūm sā ik ḳhvāb the us raat se pahle

the kitne ḳhunak terī ghanī zulf ke saa.e

in ġham ke sulagte hue lamhāt se pahle

thī mulk-kushā.ī mire īmāñ kī rah-o-rasm

in ḳhānqahī rasm-o-rivāyāt se pahle

rūdād-e-chaman itnī hai ik sho'la 'na.īmī'

uThThā thā nasheman ke mazāfāt se pahle

har samt charaghan sa tha zulmat se pahle

dekhi thi sahar hum ne bhi is raat se pahle

me’yar-e-suKHan zer-o-bam-e-nai to nahin hai

har naghma faqat chiKH hai jazbaat se pahle

jiddat ka chaman hai usi fankar ka hissa

guzra hai jo sahra-e-riwayat se pahle

har rah ye kahti hai yaqinan koi suraj

guzra hai daraKHshani-e-zarraat se pahle

yun chain to qismat mein kabhi bhi na tha lekin

ye haal na tha pursish-e-haalat se pahle

hum ne bhi gham-e-zindagi sine se lagaya

lekin ye hua teri mulaqat se pahle

ye rang ye bu jo hain teri zulf ka talchhaT

mauhum sa ek KHwab the us raat se pahle

the kitne KHunak teri ghani zulf ke sae

in gham ke sulagte hue lamhat se pahle

thi mulk-kushai mere iman ki rah-o-rasm

in KHanqahi rasm-o-riwayat se pahle

rudad-e-chaman itni hai ek sho'la 'naimi'

uThTha tha nasheman ke mazafat se pahle