dekhna hai ki mujhe kaun kahan khinchta hai

dekhnā hai ki mujhe kaun kahāñ khīñchtā hai

hai idhar 'ishq udhar mujh ko jahāñ khīñchtā hai

jab se mā'shūq kī khiḌkī pe khiñchā hai parda

tab se 'āshiq hai ki cigarette se dhuāñ khīñchtā hai

ham pe barse hue tīroñ kā kare kaun insāf

ab to sunte haiñ ki munsif bhī kamāñ khīñchtā hai

bevafā keh de agar us ko shab-e-hijrāñ meñ

haath merā hī mire dil kī zabāñ khīñchtā hai

tiir ke saath hī khīñchā hai mirā dil bāhar

tiir siine se koī aise kahāñ khīñchtā hai

ashk bahte na agar ġham se ye dil phaT jaatā

ranj-o-ġham dil se yahī āb-e-ravāñ khīñchtā hai

hai yaqīñ mujh ko tujhe 'ishq nahīñ hai mujh se

kyā mujhe terī taraf koī gumāñ khīñchtā hai

dekhna hai ki mujhe kaun kahan khinchta hai

hai idhar 'ishq udhar mujh ko jahan khinchta hai

jab se ma'shuq ki khiDki pe khincha hai parda

tab se 'ashiq hai ki cigarette se dhuan khinchta hai

hum pe barse hue tiron ka kare kaun insaf

ab to sunte hain ki munsif bhi kaman khinchta hai

bewafa keh de agar us ko shab-e-hijran mein

hath mera hi mere dil ki zaban khinchta hai

tir ke sath hi khincha hai mera dil bahar

tir sine se koi aise kahan khinchta hai

ashk bahte na agar gham se ye dil phaT jata

ranj-o-gham dil se yahi aab-e-rawan khinchta hai

hai yaqin mujh ko tujhe 'ishq nahin hai mujh se

kya mujhe teri taraf koi guman khinchta hai