har chand fasadat mein KHanjar bhi mera tha

har chand fasādāt meñ ḳhanjar bhī mirā thā

jo tan se judā ho gayā vo sar bhī mirā thā

ubhrā jo tire zaḳhm se vo dard thā merā

jo tujh ko lagā aa ke vo patthar bhī mirā thā

jo aag lagī vo thī lagā.ī huī merī

jo ḳhaak huā jaatā thā vo ghar bhī mirā thā

ehsās ke resham meñ vo narmī bhī mirī thī

jazbāt ke tūfān meñ tevar bhī mirā thā

ḳhalvat meñ sulagtī huī vo pyaas thī merī

mahfil meñ chhalaktā huā sāġhar bhī mirā thā

jo fat.h milī thī use vo fat.h mirī thī

jo haar gayā ran meñ vo lashkar bhī mirā thā

maiñ 'āshnā' muḳhtār bhī majbūr bhī Thahrā

tadbīr bhī merī thī muqaddar bhī mirā thā

har chand fasadat mein KHanjar bhi mera tha

jo tan se juda ho gaya wo sar bhi mera tha

ubhra jo tere zaKHm se wo dard tha mera

jo tujh ko laga aa ke wo patthar bhi mera tha

jo aag lagi wo thi lagai hui meri

jo KHak hua jata tha wo ghar bhi mera tha

ehsas ke resham mein wo narmi bhi meri thi

jazbaat ke tufan mein tewar bhi mera tha

KHalwat mein sulagti hui wo pyas thi meri

mahfil mein chhalakta hua saghar bhi mera tha

jo fath mili thi use wo fath meri thi

jo haar gaya ran mein wo lashkar bhi mera tha

main 'ashna' muKHtar bhi majbur bhi Thahra

tadbir bhi meri thi muqaddar bhi mera tha