سر میں سودا ہو ترا دل میں تری یاد رہے

سر میں سودا ہو ترا دل میں تری یاد رہے

اس سے جو بچ کے رہے بس وہی برباد رہے

مذہب عشق میں جینا ہے انہیں لوگوں کا

جن کو ہر وقت ترا دھیان تری یاد رہے

تا در یار کبھی اپنی رسائی نہ ہوئی

ہم اسی دھن میں اسی فکر میں برباد رہے

ایک دن بھی نہ ہوا وصل نصیب اس گل کا

عشق کا پھل یہ ملا مائل فریاد رہے

سخت جانی مری تلواروں کا منہ موڑ نہ دے

ساتھ تلوار کے اک خنجر فولاد رہے

قتل کرکے مجھے کس ناز سے فرماتے ہیں

میرے کشتہ کو یہ احسان مرا یاد رہے

میں وہ محسنؔ ہوں کہ ارباب کرم کا ہوں غلام

میرے بد خواہ کو بھی نام مرا یاد رہے