sar mein sauda ho tera dil mein teri yaad rahe

sar meñ saudā ho tirā dil meñ tirī yaad rahe

us se jo bach ke rahe bas vahī barbād rahe

maz.hab-e-'ishq meñ jiinā hai unhīñ logoñ kā

jin ko har vaqt tirā dhyān tirī yaad rahe

tā-dar-e-yār kabhī apnī rasā.ī na huī

ham isī dhun meñ isī fikr meñ barbād rahe

ek din bhī na huā vasl nasīb us gul kā

'ishq kā phal ye milā mā.il-e-fariyād rahe

saḳht-jānī mirī talvāroñ kā muñh moḌ na de

saath talvār ke ik ḳhanjar-e-faulād rahe

qatl karke mujhe kis naaz se farmāte haiñ

mere kushte ko ye ehsān mirā yaad rahe

maiñ vo 'mohsin' huuñ ki arbāb-e-karam kā huuñ ġhulām

mere bad-ḳhvāh ko bhī naam mirā yaad rahe

sar mein sauda ho tera dil mein teri yaad rahe

us se jo bach ke rahe bas wahi barbaad rahe

mazhab-e-'ishq mein jina hai unhin logon ka

jin ko har waqt tera dhyan teri yaad rahe

ta-dar-e-yar kabhi apni rasai na hui

hum isi dhun mein isi fikr mein barbaad rahe

ek din bhi na hua wasl nasib us gul ka

'ishq ka phal ye mila mail-e-fariyaad rahe

saKHt-jaani meri talwaron ka munh moD na de

sath talwar ke ek KHanjar-e-faulad rahe

qatl karke mujhe kis naz se farmate hain

mere kushte ko ye ehsan mera yaad rahe

main wo 'mohsin' hun ki arbab-e-karam ka hun ghulam

mere bad-KHwah ko bhi nam mera yaad rahe