muddaton mein kahin sikha hai ye fariyaad ka fan

muddatoñ meñ kahīñ sīkhā hai ye fariyād kā fan

aur ghaTā kahtī hai kāġhaz ke libāde na pahan

ghar se bāhar na nikal fasl-e-bahār aa.ī hai

apnī mahkār se jal uTThegā mahkā huā pan

chāñd Duubā to dikhā.ī na diyā saayā bhī

ghul gayā raat kī tārīkī meñ shaffāf badan

rāsta rok sakā kaun fasīleñ ki hisār

dasht tak phail gayā āb-e-ravāñ kā dāman

kyā hue ashk jo pat-jhaḌ meñ bahā.e maiñ ne

mil gayā phir se daraḳhtoñ ko luTāyā huā dhan

kyā use tez havā kā koī andāza nahīñ

jis ne dīvār samajh rakkhī hai apnī chilman

fāsle donoñ taraf kaun batā.e lekin

dasht vāloñ ke liye duur hai dariyā ki gagan

sāya-e-gul ko taraste haiñ zamāne vaale

aur mirī raah meñ haa.il huī dīvār-e-chaman

na sukūñ shahr meñ paayā na amaañ sahrā meñ

sar-e-pul baiTh ga.e haar ke yārān-e-kuhan

ḳhauf-e-tā’zīr ne shal kar diye baazū 'shahzād'

ruk gayā ek hī dīvār se dariyā-e-suḳhan

muddaton mein kahin sikha hai ye fariyaad ka fan

aur ghaTa kahti hai kaghaz ke libaade na pahan

ghar se bahar na nikal fasl-e-bahaar aai hai

apni mahkar se jal uTThega mahka hua pan

chand Duba to dikhai na diya saya bhi

ghul gaya raat ki tariki mein shaffaf badan

rasta rok saka kaun fasilen ki hisar

dasht tak phail gaya aab-e-rawan ka daman

kya hue ashk jo pat-jhaD mein bahae main ne

mil gaya phir se daraKHton ko luTaya hua dhan

kya use tez hawa ka koi andaza nahin

jis ne diwar samajh rakkhi hai apni chilman

fasle donon taraf kaun batae lekin

dasht walon ke liye dur hai dariya ki gagan

saya-e-gul ko taraste hain zamane wale

aur meri rah mein hail hui diwar-e-chaman

na sukun shahr mein paya na aman sahra mein

sar-e-pul baiTh gae haar ke yaran-e-kuhan

KHauf-e-ta’zir ne shal kar diye bazu 'shahzad'

ruk gaya ek hi diwar se dariya-e-suKHan