nikle the zahr ban ke jo dil ki kaman se

nikle the zahr ban ke jo dil kī kamān se

vo tiir the ki lafz jo nikle zabān se

har ek harf ek nayā zaḳhm de gayā

ham kyā hī āshnā hue un ke bayān se

vo jā chuke the ham ko yaqīñ der se huā

rokā huā thā jin ko purāne gumān se

kuchh is tarah vo dil meñ utarte chale ga.e

jaise amaan aa ke mile be-amān se

ḳhāmoshiyoñ ne aur bhī uljhā diyā hameñ

vo baat kar rahe the dil-e-be-zabān se

kuchh fāsle bhī baḌh ga.e donoñ ke darmiyāñ

kuchh ham bhī bach na paa.e dil-e-bad-gumān se

ruḳhsat ke vaqt māthe pe bosa liyā thā jo

mahkā huā hai aaj bhī dil us nishān se

ham se nigāh pher ke kuchh yuuñ sitam kiyā

vo dekhte rahe hameñ apne jahān se

ham ne to chāhatoñ ko 'ibādat banā liyā

haT hī na paayā dil ye kisī āstān se

'ambar' savāl dil ke sar-e-'ām rakh diye

vo phir bhī mutma.in na hue imtihān se

nikle the zahr ban ke jo dil ki kaman se

wo tir the ki lafz jo nikle zaban se

har ek harf ek naya zaKHm de gaya

hum kya hi aashna hue un ke bayan se

wo ja chuke the hum ko yaqin der se hua

roka hua tha jin ko purane guman se

kuchh is tarah wo dil mein utarte chale gae

jaise aman aa ke mile be-aman se

KHamoshiyon ne aur bhi uljha diya hamein

wo baat kar rahe the dil-e-be-zaban se

kuchh fasle bhi baDh gae donon ke darmiyan

kuchh hum bhi bach na pae dil-e-bad-guman se

ruKHsat ke waqt mathe pe bosa liya tha jo

mahka hua hai aaj bhi dil us nishan se

hum se nigah pher ke kuchh yun sitam kiya

wo dekhte rahe hamein apne jahan se

hum ne to chahaton ko 'ibaadat bana liya

haT hi na paya dil ye kisi aastan se

'ambar' sawal dil ke sar-e-'am rakh diye

wo phir bhi mutmain na hue imtihan se