ye kainat surahi thi jam aankhen thin

ye kā.ināt surāhī thī jaam āñkheñ thiiñ

mavāsalāt kā pahlā nizām āñkheñ thiiñ

ġhanīm-e-shahr ko vo thā basāratoñ kā junūñ

ki jab bhī lauT ke laayā tamām āñkheñ thī

ab aa ga.e haiñ ye chehroñ ke zaḳhm bharne ko

kahāñ ga.e the manāzir jo 'aam āñkheñ thiiñ

ḳhutūt-e-nūr se har hāshiya muzayyan thā

kitāb-e-husn meñ saarā kalām āñkheñ thiiñ

vo qāfila kisī andhe nagar se aayā thā

har ek shaḳhs kā takiya-kalām āñkheñ thiiñ

nazar-faroz thā yūsuf kā pairahan shāyad

dayār-e-misr se pahlā salām āñkheñ thiiñ

tum aur der na dikhte to mar ga.ī hotīñ

qasam ḳhudā kī bahut tishna-kām āñkheñ thiiñ

ġhazāl dekhne aate the dasht bhar ke inheñ

mirī galī meñ 'ajab tīra-fām āñkheñ thiiñ

ik 'ahd ham ne vo dekhā ki jo dikhāyā gayā

ġhulām chehre the apne ġhulām āñkheñ thiiñ

ye kainat surahi thi jam aankhen thin

mawasalat ka pahla nizam aankhen thin

ghanim-e-shahr ko wo tha basaraton ka junun

ki jab bhi lauT ke laya tamam aankhen thi

ab aa gae hain ye chehron ke zaKHm bharne ko

kahan gae the manazir jo 'am aankhen thin

KHutut-e-nur se har hashiya muzayyan tha

kitab-e-husn mein sara kalam aankhen thin

wo qafila kisi andhe nagar se aaya tha

har ek shaKHs ka takiya-kalam aankhen thin

nazar-faroz tha yusuf ka pairahan shayad

dayar-e-misr se pahla salam aankhen thin

tum aur der na dikhte to mar gai hotin

qasam KHuda ki bahut tishna-kaam aankhen thin

ghazal dekhne aate the dasht bhar ke inhen

meri gali mein 'ajab tira-fam aankhen thin

ek 'ahd hum ne wo dekha ki jo dikhaya gaya

ghulam chehre the apne ghulam aankhen thin