pas phaTke na zara mujhko bachane wale

paas phaTke na zarā mujh ko bachāne vaale

aa ke phir baiTh ga.e dil meñ satāne vaale

sehr-o-e'jāz hai kyā chiiz hai un āñkhoñ meñ

kis qadar ḳhush haiñ dil-o-jān luTāne vaale

ulTī sīdhī koī paTTī vo paḌhāte haiñ zarūr

ghūrte haiñ mujhe us bazm se aane vaale

aap ko 'ahd-e-vafā yaad na ho lekin ham

dār-e-fānī se akele nahīñ jaane vaale

us ne paa.ī hai qayāmat sī qayāmat āvāz

khiñch ke aa jaate haiñ ḳhud jaan se jaane vaale

is ġhalat-fahmī meñ mat rah ki chale jā.eñge

tere kūche se ye āvāz lagāne vaale

sochne lagtā huuñ kyā kyā koī jab kahtā hai

pūchhte rahte haiñ tujh ko vo satāne vaale

kyuuñ hasīnoñ kā dukhā dete ho dil tum 'zāmin'

DhūñDhte phirte ho phir sulh karāne vaale

pas phaTke na zara mujh ko bachane wale

aa ke phir baiTh gae dil mein satane wale

sehr-o-e'jaz hai kya chiz hai un aankhon mein

kis qadar KHush hain dil-o-jaan luTane wale

ulTi sidhi koi paTTi wo paDhate hain zarur

ghurte hain mujhe us bazm se aane wale

aap ko 'ahd-e-wafa yaad na ho lekin hum

dar-e-fani se akele nahin jaane wale

us ne pai hai qayamat si qayamat aawaz

khinch ke aa jate hain KHud jaan se jaane wale

is ghalat-fahmi mein mat rah ki chale jaenge

tere kuche se ye aawaz lagane wale

sochne lagta hun kya kya koi jab kahta hai

puchhte rahte hain tujh ko wo satane wale

kyun hasinon ka dukha dete ho dil tum 'zamin'

DhunDhte phirte ho phir sulh karane wale