nashat-e-subh-e-bahaar chehra ghaTaen zulfen KHumar aankhen

nashāt-e-sub.h-e-bahār chehra ghaTā.eñ zulfeñ ḳhumār āñkheñ

kamāl-e-mastī nazar kī shoḳhī nazar pe merī nisār āñkheñ

maiñ tujh se pahle hudūd-e-imkāñ meñ ek inkār kī sadā thā

mire liye to faqat haiñ terī dalīl-e-parvardigār āñkheñ

tujhe ai shaiḳh-e-haram ḳhabar kyā girāñ na guzre to 'arz kar duuñ

ki zindagī to fuzūl shai hai na deñ kisī kī jo maar āñkheñ

kahāñ vo āñkheñ ki nūriyoñ ne jinheñ nisāb-e-jamāl jaanā

kahāñ za-shauq-e-jamāl-e-ḳhūbāñ ye hasratoñ kā mazār āñkheñ

kahīñ to āñkhoñ kī ek jumbish se nazm-e-kaun-o-makāñ hai barham

kahīñ pe be-iḳhtiyār-o-bebas kahīñ ġharīb-ud-dayār āñkheñ

nazar lage kyuuñ kisī kī mujh ko maiñ us kī āñkhoñ ko sochtā huuñ

mujhe nahīñ Dar ki do jahāñ meñ mirā to haiñ vo hisār āñkheñ

sar-e-niyāz-e-suḳhan jhukā hai qalam jhukā hai dahan jhukā hai

kinār-e-nahr-e-furāt ujḌīñ ḳhudā kā thiiñ jo vaqār āñkheñ

nashat-e-subh-e-bahaar chehra ghaTaen zulfen KHumar aankhen

kamal-e-masti nazar ki shoKHi nazar pe meri nisar aankhen

main tujh se pahle hudud-e-imkan mein ek inkar ki sada tha

mere liye to faqat hain teri dalil-e-parwardigar aankhen

tujhe ai shaiKH-e-haram KHabar kya giran na guzre to 'arz kar dun

ki zindagi to fuzul shai hai na den kisi ki jo mar aankhen

kahan wo aankhen ki nuriyon ne jinhen nisab-e-jamal jaana

kahan za-shauq-e-jamal-e-KHuban ye hasraton ka mazar aankhen

kahin to aankhon ki ek jumbish se nazm-e-kaun-o-makan hai barham

kahin pe be-iKHtiyar-o-bebas kahin gharib-ud-dayar aankhen

nazar lage kyun kisi ki mujh ko main us ki aankhon ko sochta hun

mujhe nahin Dar ki do jahan mein mera to hain wo hisar aankhen

sar-e-niyaz-e-suKHan jhuka hai qalam jhuka hai dahan jhuka hai

kinar-e-nahr-e-furaat ujDin KHuda ka thin jo waqar aankhen