KHamosh zamanon ke asrar meri aankhen

ḳhāmosh zamānoñ ke asrār mirī āñkheñ

tārīk shab-e-ġham meñ bedār mirī āñkheñ

tārāj kiyā dil ko ik shoḳh tabassum ne

pāmāl kareñgī ab pindār mirī āñkheñ

maiḳhāne kī jānib se pherī hai nazar maiñ ne

dīdār kī lazzat se sarshār mirī āñkheñ

pāband-e-vafā lab haiñ chup chaap sar-e-mahfil

be-bāk kareñgī ab iqrār mirī āñkheñ

lā-chār masīhā kī tadbīr huī bātil

āseb-e-mohabbat se bīmār mirī āñkheñ

yūsuf kī ḳharīdārī hotī nahīñ dirham se

ābād kareñgī ab bāzār mirī āñkheñ

ro ro ke tire ġham meñ ik roz mire hamdam

kar deñgī bayābāñ ko gulzār mirī āñkheñ

barbād mohabbat ke qisse na sunāo tum

vīrān dayāroñ ke āsār mirī āñkheñ

rastoñ kī masāfat se thak haar gayā hai dil

zanjīr-e-ta'alluq se bezār mirī āñkheñ

KHamosh zamanon ke asrar meri aankhen

tarik shab-e-gham mein bedar meri aankhen

taraj kiya dil ko ek shoKH tabassum ne

pamal karengi ab pindar meri aankhen

maiKHane ki jaanib se pheri hai nazar main ne

didar ki lazzat se sarshaar meri aankhen

paband-e-wafa lab hain chup chap sar-e-mahfil

be-bak karengi ab iqrar meri aankhen

la-chaar masiha ki tadbir hui baatil

aaseb-e-mohabbat se bimar meri aankhen

yusuf ki KHaridari hoti nahin dirham se

aabaad karengi ab bazar meri aankhen

ro ro ke tere gham mein ek roz mere hamdam

kar dengi bayaban ko gulzar meri aankhen

barbaad mohabbat ke qisse na sunao tum

viran dayaron ke aasar meri aankhen

raston ki masafat se thak haar gaya hai dil

zanjir-e-ta'alluq se bezar meri aankhen