lag rahe hain abhi hazraat ko aKHbar se hum

lag rahe haiñ abhī hazrāt ko aḳhbār se ham

din guzar jā.egā ho jā.eñge be-kār se ham

itnī ulfat hai qafas se ki ḳhudā jāntā hai

dar jo khultā hai lipaT jaate haiñ dīvār se ham

ham ki aa.e haiñ asīroñ kī hifāzat ke liye

garche zindān meñ lagte haiñ giraftār se ham

tere ehsās kī tā'rīf kiyā karte haiñ

bechte phirte haiñ nusḳhe tire bīmār se ham

ham pe afsos karo aa ke zamāne vaalo

kitnī kam-'umrī meñ uktā ga.e ghar-bār se ham

terī parchhā.ī meñ bhīgī huī rā'nā.ī-e-shab

dekhte rahte haiñ baiThe hue be-kār se ham

lag rahe hain abhi hazraat ko aKHbar se hum

din guzar jaega ho jaenge be-kar se hum

itni ulfat hai qafas se ki KHuda jaanta hai

dar jo khulta hai lipaT jate hain diwar se hum

hum ki aae hain asiron ki hifazat ke liye

garche zindan mein lagte hain giraftar se hum

tere ehsas ki ta'rif kiya karte hain

bechte phirte hain nusKHe tere bimar se hum

hum pe afsos karo aa ke zamane walo

kitni kam-'umri mein ukta gae ghar-bar se hum

teri parchhai mein bhigi hui ra'nai-e-shab

dekhte rahte hain baiThe hue be-kar se hum