ek insan hun insan ka parastar hun main

ek insān huuñ insāñ kā parastār huuñ maiñ

phir bhī duniyā kī nigāhoñ meñ gunahgār huuñ maiñ

gardish-e-vaqt ne is haal meñ chhoḌā hai mujhe

ab kisī shahr kā luuTā huā bāzār huuñ maiñ

dar pe rahne de mujhe TaaT kā parda hī sahī

tere aslāf kā chhoḌā huā kirdār huuñ maiñ

kitnā mazbūt hai ai dost ta.alluq kā mahal

barf kī chhat hai jo tū ret kī dīvār huuñ maiñ

ḳhūn-bar-dosh huuñ maiñ zañg-rasīda to nahīñ

hai mujhe faḳhr ki TuuTī huī talvār huuñ maiñ

ye jafāoñ kī sazā hai ki tamāshā.ī hai tū

ye vafāoñ kī sazā hai ki pa.e-dār huuñ maiñ

haath phailā to kisī saa.e ne rokā 'hāmid'

us se pūchhā to kahā jazba-e-ḳhud-dār huuñ maiñ

ek insan hun insan ka parastar hun main

phir bhi duniya ki nigahon mein gunahgar hun main

gardish-e-waqt ne is haal mein chhoDa hai mujhe

ab kisi shahr ka luTa hua bazar hun main

dar pe rahne de mujhe TaT ka parda hi sahi

tere aslaf ka chhoDa hua kirdar hun main

kitna mazbut hai ai dost talluq ka mahal

barf ki chhat hai jo tu ret ki diwar hun main

KHun-bar-dosh hun main zang-rasida to nahin

hai mujhe faKHr ki TuTi hui talwar hun main

ye jafaon ki saza hai ki tamashai hai tu

ye wafaon ki saza hai ki pae-dar hun main

hath phaila to kisi sae ne roka 'hamid'

us se puchha to kaha jazba-e-KHud-dar hun main