ek ghar apne liye tayyar karna hai mujhe

ek ghar apne liye tayyār karnā hai mujhe

aur ik bastī ko bhī mismār karnā hai mujhe

is añdhere meñ chhupānā hai koī dushman magar

is ujāle meñ kisī par vaar karnā hai mujhe

ek naddī ke kināre par Thaharne ke liye

shaam hone tak ye dariyā paar karnā hai mujhe

DhūñD laayā huuñ ḳhushī kī chhāñv jis ke vāste

ek ġham se bhī use do-chār karnā hai mujhe

bhāñdhnī hai āḳhirī ik chaal se saarī bisāt

aur us kā daav bhī be-kār karnā hai mujhe

kis samundar meñ utarnā hai paḌāv ke liye

kis nagar ko ab gale kā haar karnā hai mujhe

ek ḳhvāhish hai jo shāyad 'umr bhar puurī na ho

ek sapne se hamesha pyaar karnā hai mujhe

ek jhoñke ko ravāñ rakhnā hai sehn-e-bāġh meñ

ek gul ko shāmil-e-guftār karnā hai mujhe

ek an-jānī sadā kī khoj meñ chalte hue

ek mub.ham rabt ko dīvār karnā hai mujhe

ek ghar apne liye tayyar karna hai mujhe

aur ek basti ko bhi mismar karna hai mujhe

is andhere mein chhupana hai koi dushman magar

is ujale mein kisi par war karna hai mujhe

ek naddi ke kinare par Thaharne ke liye

sham hone tak ye dariya par karna hai mujhe

DhunD laya hun KHushi ki chhanw jis ke waste

ek gham se bhi use do-chaar karna hai mujhe

bhandhni hai aaKHiri ek chaal se sari bisat

aur us ka daw bhi be-kar karna hai mujhe

kis samundar mein utarna hai paDaw ke liye

kis nagar ko ab gale ka haar karna hai mujhe

ek KHwahish hai jo shayad 'umr bhar puri na ho

ek sapne se hamesha pyar karna hai mujhe

ek jhonke ko rawan rakhna hai sehn-e-bagh mein

ek gul ko shamil-e-guftar karna hai mujhe

ek an-jaani sada ki khoj mein chalte hue

ek mubham rabt ko diwar karna hai mujhe