wo ajnabi tha phir bhi laga aashna mujhe

vo ajnabī thā phir bhī lagā āshnā mujhe

kis samt le chalā hai nayā hādsa mujhe

mujh ko bhī DhūñDtī ram-e-ayyām kī chamak

rakhtā 'azīz gar kabhī merā ḳhudā mujhe

mujh ḳhasta-tan ko ghar meñ kahāñ DhūñDte ho ab

do dasht-e-nā-murādī-e-dil meñ sadā mujhe

vāqif nahīñ huuñ shakl se atvār se magar

lagtā hai us kā naam hī aksar bhalā mujhe

maiñ ghar kī raushnī huuñ mujhe mahfiloñ se kyā

chehroñ ke mai-kade meñ na denā sadā mujhe

ai kaash tū bhī suntā kabhī āhaToñ kī guuñj

tū bhī mirī tarah se kabhī DhūñDtā mujhe

pairoñ ke aable na mirā saath de sake

jab rahnumā bhī raah kā patthar lagā mujhe

'nāhīd' us kī yaad kā āñchal bhī sub.h ko

uḌtā huā havā meñ bagūlā lagā mujhe

wo ajnabi tha phir bhi laga aashna mujhe

kis samt le chala hai naya hadsa mujhe

mujh ko bhi DhunDti ram-e-ayyam ki chamak

rakhta 'aziz gar kabhi mera KHuda mujhe

mujh KHasta-tan ko ghar mein kahan DhunDte ho ab

do dasht-e-na-muradi-e-dil mein sada mujhe

waqif nahin hun shakl se atwar se magar

lagta hai us ka nam hi aksar bhala mujhe

main ghar ki raushni hun mujhe mahfilon se kya

chehron ke mai-kade mein na dena sada mujhe

ai kash tu bhi sunta kabhi aahaTon ki gunj

tu bhi meri tarah se kabhi DhunDta mujhe

pairon ke aable na mera sath de sake

jab rahnuma bhi rah ka patthar laga mujhe

'nahid' us ki yaad ka aanchal bhi subh ko

uDta hua hawa mein bagula laga mujhe