wo agar be-KHabar nahin hota

vo agar be-ḳhabar nahīñ hotā

haal apnā digar nahīñ hotā

un kī chashm-e-karam agar hotī

aaj maiñ dar-ba-dar nahīñ hotā

sang hī se navāzte mujh ko

tum se ye bhī magar nahīñ hotā

har tabassum nahīñ masīhā.ī

har koī chāra-gar nahīñ hotā

bhiig jaatā thā pahle dāman tak

ab to diida bhī tar nahīñ hotā

pahle un kī thī sub.h-o-shām yahāñ

ab to barsoñ guzar nahīñ hotā

gaahe gaahe agar ḳhushī miltī

ġham kā itnā asar nahīñ hotā

kārvāñ kitne hī badal Daale

ḳhatm phir bhī safar nahīñ hotā

'nūr' ehsās jis kā mar jaa.e

us pe kuchh bhī asar nahīñ hotā

wo agar be-KHabar nahin hota

haal apna digar nahin hota

un ki chashm-e-karam agar hoti

aaj main dar-ba-dar nahin hota

sang hi se nawazte mujh ko

tum se ye bhi magar nahin hota

har tabassum nahin masihai

har koi chaara-gar nahin hota

bhig jata tha pahle daman tak

ab to dida bhi tar nahin hota

pahle un ki thi subh-o-sham yahan

ab to barson guzar nahin hota

gahe gahe agar KHushi milti

gham ka itna asar nahin hota

karwan kitne hi badal Dale

KHatm phir bhi safar nahin hota

'nur' ehsas jis ka mar jae

us pe kuchh bhi asar nahin hota